Jer turǵyndary aıdyń tolyq tutylýyn tamashalaıdy

NUR-SULTAN. QazAqparat – Erteń, 26 mamyr kúni Nur-Sultan ýaqytymen saǵat 15:45 pen 18:53 aralyǵynda Aı tolyqtaı tutylady, dep habarlaıdy QazAqparat tilshisi.

Jer ǵalamshary Kún men Aıdyń ortasyna kelgende Aı tutylady, ıaǵnı Jerdiń kóleńkesi seriginiń betine túsedi. Basqasha aıtqanda, aspan deneleri bir qatarǵa turady. Jer kóleńkesine tolyq kirgennen keıin Aıdyń júzi qyzǵylt reńkke enedi. Sol sebepti bul qubylysty keıde «qandy Aı» dep te aıtady. Aı Jerdiń kóleńke aımaǵyna engende, Aı tutylýy bastalady. Ókinishke oraı, qazaqstandyqtar tabıǵattyń osynaý biregeı sátin tamashalaı almaıdy. Ony Shyǵys Azııa, Aýstralııa, Tynyq muhıty jáne Amerıka turǵyndary kóredi.

Aıta keterligi 10 maýsymda Kún saqınaly túrde tutylady. Ol Soltústik Kanada, Grenlandııa jáne Reseıde jaqsy baıqalady. Saqınalyq jáne jartylaı fazalardy TMD elderiniń aýmaǵynan kórýge bolady.

Al 19 qarashada Aıdyń ishinara tutylady. Onyń ártúrli fazalaryn Ońtústik Amerıka, Indonezııa, Aýstralııa, Azııa jáne Qıyr Shyǵystyń turǵyndary kóredi. Tolyq tutylýdy Soltústik Amerıka, Chýkotka jáne Kamchatkada baıqaýǵa múmkindik bar.

Sondaı-aq 4 jeltoqsanda Kún tolyq tutylýy múmkin. Onyń beldeýi Tynyq jáne Atlant muhıttary arqyly, sondaı-aq Antarktıda arqyly ótedi. Tutylýdyń kishigirim fazalaryn Afrıkanyń ońtústiginen jáne Aýstralııadan kórýge bolady.

Avtory Sara Kabıqyzy