Jer týraly zań jobasy Senatqa joldandy
Agrarlyq máseleler komıtetiniń múshesi, depýtat Berik Ospanovtyń aıtýynsha, atalǵan qujat Jer komıssııasynyń jumysy nátıjesinde ázirlengen. Komıssııa birneshe sheshim shyǵarǵan bolsa, sonyń barlyǵy zań jobasyna enip otyr. "Máselen, jarǵylyq kapıtalynda sheteldikterdiń nemese sheteldik zańdy tulǵalardyń úlesi bar birlesken kásiporyndarǵa aýyl sharýashylyq jerlerin jalǵa berýge moratorııdiń qoldanylýy keńeıtiledi. Endi, jarǵylyq kapıtalǵa sheteldik qatysýdyń kez kelgen paıyzy jer ýchaskesine tıisti quqyqtardy almaýǵa sebep bolady. Osylaısha, aýyl sharýashylyǵy maqsatyndaǵy jerler 2021 jylǵy 31 jeltoqsanǵa deıin sheteldik jer paıdalanýshylarǵa jalǵa berilmeıdi. Barlyq jeke jáne zańdy tulǵalardyń jeke menshigine de berilmeıtin bolady. Al respýblıka azamattaryna jáne sheteldikter qatyspaıtyn zańdy tulǵalarǵa aýyl sharýashylyǵy maqsatyndaǵy jerler ýaqytsha jerdi paıdalaný quqyǵymen ǵana beriledi", - dep atap kórsetti B.Ospanov.
Depýtattyń sózine qaraǵanda, zań jobasy aıasynda otandyq jer paıdalanýshylarǵa jerdi jalǵa berý ınstıtýtyn jetildirý sharalary josparlanǵan. Ol úshin aýyl sharýashylyǵy maqsatyndaǵy jerlerdi konkýrstyq negizde jalǵa berý tártibin retteıtin normalar engizilip otyr. Konkýrstardyń ashyqtyǵyn qamtamasyz etý maqsatynda jer komıssııalarynyń quramyna memlekettik qyzmetshilerden bólek qoǵam ókilderi de kiretin bolady. "Sondaı-aq, turaqty monıtorıng engizý arqyly aýyl sharýashylyǵy jerleriniń utymdy paıdalanylýyn baqylaýdy kúsheıtý kózdelgen. Bul sharalar aýyl sharýashylyǵy maqsatyndaǵy jerlerdi tıimdi paıdalanýǵa, paıdalanbaı jatqan jerlerdi ýaqtyly anyqtaýǵa jáne olardy sharýashylyq aınalymǵa tartýǵa, sondaı-aq, qoǵamdyq baqylaýdy arttyrýǵa múmkindik beredi", - dep atap kórsetti B.Ospanov.
Budan bólek, zań jobasynda árbir aımaqtyń tabıǵı sıpaty men ekonomıkalyq mamandanýyna qaraı jerdiń shekti mólsherin belgileý kózdelip otyr. Shekara aımaǵyndaǵy jerlerdi berý talaptary da aıqyndaldy. Al aýyldyń aınalasyndaǵy jaıylymdyq jáne shabyndyq jerleri bárine ortaq bolady.
Aıta keteıik, qujattyń tolyq ataýy - "Qazaqstan Respýblıkasynyń keıbir zańnamalyq aktilerine jer qatynastaryn retteý máseleleri boıynsha ózgerister men tolyqtyrýlar engizý týraly" zań jobasy. Aldaǵy ýaqytta ony senatorlardyń talqylaýyna shyǵarady.
