Jer týraly zań qabyldansa, sheteldikterge jer berýge qatysty talas-tartys toqtaıdy - Qarın
«Májilistiń jalpy otyrysynda ekinshi oqylymda aýyl sharýashylyǵy maqsatyndaǵy jerlerdi sheteldik azamattar men sheteldik qatysýy bar kásiporyndarǵa satýǵa jáne jalǵa berýge tyıym salýdy kózdeıtin jer týraly zań qabyldandy. Bul zańdy ázirleýdi Qasym-Jomart Toqaev 25 aqpanda Ulttyq qoǵamdyq senim keńesiniń V otyrysynda usynyp, osy qujatty Prezıdenttiń zań shyǵarý bastamasy aıasynda daıyndaýdy tapsyrdy. Al 12 naýryzda Zań jobasy Prezıdenttiń arnaıy joldaýymen Májilistiń qaraýyna engizildi», - dep jazdy E. Qarın óziniń Telegram-paraqshasynda.
Atalǵan zań jobasy boıynsha jumys tobynyń 3 otyrysy jáne Agrarlyq máseleler komıtetiniń 2 keńeıtilgen otyrysy ótti. 7 sáýirde jalpy otyrysta depýtattar qujatty birinshi oqylymda qarady.
«Búgin zań jobasyn Májilis depýtattary maquldady jáne endi Senattyń qaraýyna jiberiledi. Osylaısha zań jobasy qarastyrýdyń barlyq negizgi kezeńderinen ótip keledi. Jer týraly zańnyń qabyldanýy ótkir pikirtalastar týdyrǵan sheteldikterdiń aýylsharýashylyq jerlerin satyp alýy men jalǵa alýy máselesine túbegeıli núkte qoıady, bul taqyryp boıynsha daýlar men túrli alypsatarlyqtardy toqtatýǵa múmkindik beredi», - dedi Erlan Qarın.
