Jer telimin bólýde kóbine qandaı zańsyzdyqtar oryn alady

NUR-SULTAN. QazAqparat - Jer telimin azamattarǵa bólý tetigin qaıta qarastyrý kerek. Bul týraly QR Sybaılas jemqorlyqqa qarsy is-qımyl agenttiginde ótken brıfıngte Tergeý departamentiniń aǵa tergeýshisi Danııar Bekaıdarov málim etti, dep habarlaıdy QazAqparat tilshisi.

Onyń sózine qaraǵanda, qylmystyq statıstıka boıynsha jer qatynastary salasynda jemqorlyq quqyq buzýshylyqtarynyń artqanyn baıqatyp otyr. Osy oraıda 2018 jyldaǵy alty aıda 82 oqıǵa bolsa, 2019 jyldaǵy jarty jylda 109 jaıt tirkelgen.

«Atalǵan qylmystyq ister boıynsha kúdikti retinde 76 adam tanyldy, al 2018 jyly 56 bolǵan edi. Onyń ishinde sotqa 54 qylmystyq is baǵyttalyp, 15 adam sottaldy. Bul qylmystar boıynsha keltirilgen shyǵyn kólemi 810 mln teńgeni qurap, búginde 783 mln teńgesi óteldi», - dedi Bekaıdarov.

Bul turǵyda jer telimin bólý men onyń nysanaly maqsatyn ózgertý kezinde kóbine para alý, alaıaqtyq jáne qyzmettik ókilettigin teris paıdalaný sııaqty áreketter anyqtalady.

«Jer telimin berýde aqparatqa qoljetimdiktiń shekteýli bolýy, rásimderiniń ashyq emestigi bul salada sybaılas jemqorlyqtyń taralýyna yqpal etýge jaǵdaı jasaıdy. Osyǵan deıin jer telimin azamattarǵa bólý tetigin qaıta qarastyrý, sondaı-aq jer ýchaskesi boıynsha aqparatty jasyrǵany úshin laýazym ıelerin ákimshilik jaýapkershiligin qatańdatý usynylǵan bolatyn», - dedi ol.