Jer telimderine salǵyrt qaraǵandar úsh jylǵa ýchaske alý quqyǵynan aıyrylýy múmkin
ASTANA. QazAqparat - QR Óńirlik damý mınıstrligi jer zańnamasyna jaýapkershiligi joq jer paıdalanýshylardy jer telimin jalǵa alý quqyǵyn úsh jylǵa aıyrý sharasyn engizýdi kóterip otyr. Atap aıtqanda, jaýapkershiligi tómen ıelenýshiler men paıdalanýshylar reestrin qurý kózdelip otyr. Osy tizimge engenderge jer ýchaskelerin usynýǵa shekteýler jasalady.
«Bul norma zańnama talaptaryn buzyp nemese maqsatty paıdalanylmaǵan jerler sot sheshimimen tárkileý týraly kúshine engen kúnnen bastap úsh jyl boıy atalǵan tulǵalarǵa jańa jer telimderi berilmeıdi», - dedi búgin Senat depýtattarynyń qatysýymen jer zańnamasy máselelerine arnalǵan jıynda QR Óńirlik damý vıtse-mınıstri Qaıyrbek Óskenbaev.
Belgili bolǵandaı, atalǵan reestr ortalyqtandyrylǵan túrde júrgiziledi.
Mınıstrlik málimetteri boıynsha elimiz aýmaǵynda jerlerdi túgendeý barysynda 5 mln. gektar aýmaqta 12 myń aýyl sharýashylyǵy maqsatyndaǵy jer telimderi anyqtaldy. Onyń 669,6 gektary jyrtylǵan jer, 14,6 myń gektary sýarmaly egister. Paıdalanylmaı kelgen jerlerdiń negizgi bóligi, ıaǵnı 2,5 mln. gektary sharýa jáne fermerlik qojalyqtarǵa tıesili.
