Jer telimderine qatysty alaıaqtyq isi boıynsha sheneýnik pen onyń sybaılastary sottaldy

QOSTANAI. QazAqparat – Qostanaı aýdandyq sotynda Qostanaı aýdany ákimdigi jer qatynastary bóliminiń burynǵy bastyǵyna qatysty qylmystyq is qaraldy, dep habarlaıdy QazAqparat tilshisi.

Erkin Sarymbet qyzmet babynda jalǵan qujat jasaǵany úshin, sondaı-aq adamdar tobynyń aldyn ala sóz baılasýy arqyly laýazymdy tulǵanyń qyzmettik babyn paıdalana otyryp jasaǵan alaıaqtyǵy úshin sotqa tartyldy.

Úsh aıyptalýshy ózderiniń «qyzmetteri» úshin júzdegen myń teńgeden mıllıondaǵan teńgege deıin alyp, jalpy kezekti aınalyp ótkisi keletinderge jer telimderin berýmen aınalysqan.

Sottyń málimetinshe, 2020 jyldyń mamyr-maýsym aılary aralyǵynda E. Sarymbet pen jeke kásipker Malıka Sársenbaeva aldaý jáne senimdi teris paıdalaný jolymen aldyn ala sóz baılasý arqyly eki jábirlenýshige tıesili jalpy kólemi 2,4 mln teńgeni (jábirlenýshi T-nyń 3,5 mln jáne K-niń 800 myń teńgesin) jymqyrǵan.

Sársenbaeva men onyń aǵasy Makıshev 2021 jyldyń mamyr aıynda sottalýshy Sarymbetti qylmystyq isti toqtatý úshin laýazymdy adamǵa para berýge kóndirgen.

«Prokýror aıyp taǵylǵan myna baptar boıynsha jaza taǵaıyndaýdy surady:

Sarymbetti 4 jylǵa bas bostandyǵynan aıyrý, ómir boıy memlekettik qyzmette jumys isteýge tyıym salý, Sársenbaevany 7 jylǵa bas bostandyǵynan aıyrý, Makıshevti 5 jylǵa bas bostandyǵynan aıyrý.

Sottalýshy Sarymbet kinásin ishinara moıyndady, sottalýshylar Sársenbaeva men Makıshev kinásin moıyndamady. Nátıjesinde, Sarymbetke 5 jyl bas bostandyǵynan aıyrý, Sársenbaevaǵa 7 jyl 6 aı bas bostandyǵynan aıyrý jáne Makıshevke 4 jyl bas bostandyǵynan aıyrý jazasy taǵaıyndaldy», - dep habarlady oblystyq sottan.

Jábirlenýshilerdiń azamattyq talaptary ishinara qanaǵattandyryldy.