Jer telimderin konkýrstan tys berý múmkindigin alyp tastaý usynyldy

NUR-SULTAN. QazAqparat - Úkimette Qazaqstan ekonomıkasyn demonopolızatsııalaý jónindegi birqatar sharalar qaraldy, - dep habarlaıdy QazAqparat Úkimettiń resmı saıtyna silteme jasap.

Premer-Mınıstr Álıhan Smaıylov Ekonomıkany demonopolızatsııalaý jónindegi komıssııanyń kezekti otyrysyn ótkizdi. Otyrys barysynda qazirgi tańda áleýmettik-kásipkerlik korporatsııalardyń ınvestıtsııalyq jáne ınnovatsııalyq jobalardy júzege asyrý úshin konkýrstan tys negizde jer telimderin bóletinin atap ótti. Bul rette ÁKK-ke olardy ıgerýde eshqandaı jaýapkershilik júktelmeıdi. Alaıda bólingen jer telimderi is júzinde kóp páterli turǵyn úıler, meıramhanalar, kólik jýý oryndaryn jáne t.b. salý úshin paıdalanylyp jatyr.

Mysal retinde elimizdiń iri qalalarynyń birinde ÁKK-ge 679 ga jer bólingeni aıtyldy, onyń 254 ga turǵyn úı qurylysyna, 96 ga kommertsııalyq obektilerge jáne tek 5 ga óndiristik baza men zaýyt salýǵa berilgen.

Atalǵan máseleni sheshý úshin ÁKK arqyly jer telimderin konkýrstan tys berý múmkindigin alyp tastaý usynyldy, bul jerdi bólýdiń ashyqtyǵyn qamtamasyz etýge jáne ony satýdan bıýdjetke túsetin túsimderdiń kólemin ulǵaıtýǵa, naryqtyń barlyq sýbektisine jerge qoljetimdilikti qamtamasyz etý úshin teń múmkindikter berýge jol ashady.

Sondaı-aq otyrysta magıstraldyq temirjol jelilerin jóndeý salasynda birneshe kompanııa ǵana qyzmet kórsetetini atap ótildi. Bul olarǵa qoıylatyn joǵary biliktilik talaptaryna baılanysty bolyp otyr.

Osyǵan baılanysty QR Premer-Mınıstri «Samuryq-Qazyna» qoryna osy salada básekelestikke qolaıly jaǵdaı jasaý úshin atalǵan talaptardy jumsartýdy qarastyrý tapsyrdy.