Jer telimderin alýdyń qıyndyǵyna baılanysty JEK jobalary iske aspaı otyr - Ekologııa mınıstri
ASTANA. 8 mamyr. QazAqparat - Jańartylatyn energııa kózderiniń nysanyn salýǵa jer ýchaskesi erekshe jaǵdaıda bólinedi.
Bul týraly búgin QR Parlamenti Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine jańartylatyn energııa kózderin paıdalanýdy qoldaý máseleleri boıynsha ózgerister men tolyqtyrýlar engizý týraly» zań jobasy boıynsha baıandaǵan Qorshaǵan ortany qorǵaý mınıstri Nurlan Qapparov málim etti.
Mınıstrdiń aıtýynsha, elimizde jańartylatyn energııa kózderiniń birneshe jobalaryn salý negizinen jer ýchaskelerin osy maqsatta paıdalanýǵa ruqsat alýdyń qıyndyǵynan baılanysty júzege aspaı otyr. Mysaly, ózen alqaptary men olarmen irgeles jatqan orman qoryna kiretin ýchaskelerine shaǵyn sý elektr stansalarynyń qurylystary qıyndyqtarǵa urynyp otyr. Bul úshin shaǵyn SES salý úshin ondaı aýmaqta ornalasqan jer ýchaskelerin orman qorynan shyǵaryp, basqa sanattarǵa aýystyrý qajet. Dál osyndaı qıyndyqtar jel elektr stansalaryn salýǵa baılanysty da oryn alýda.
«Jer kodeksine sáıkes, jerdiń nysanaly maqsatyn ózgertýge baılanysty ony bir sanattan ekinshi sanatqa aýystyrý Úkimet pen jergilikti atqarýshy organdarǵa berilgen. Alaıda, kodekste jańartylatyn energııa kózderi nysandarynyń qurylysyna belgili sanattaǵy jerlerdi bólý kózdelmegen. Sol úshin jańartylatyn energııa kózderiniń túrli nysandaryn salý maqsatynda erekshe jaǵdaılarda jer bólý boıynsha tolyqtyrý engiziledi», - dedi N. Qapparov.
