Jer silkinisinen qorǵaný: Almaty LED-ekrandarynda arnaıy beınerolıkter kórsetiledi

ALMATY. KAZINFORM — Almatyda halyqty jer silkinisi jáne basqa da tótenshe jaǵdaılar kezindegi is-qımyldarǵa úıretýge baǵyttalǵan 7 beınerolıkten turatyn toptama ázirlenip jatyr.

Bul týraly agenttik saýalyna jaýap bergen Almaty qalasynyń Jumyldyrý daıyndyǵy, aýmaqtyq jáne azamattyq qorǵanys basqarmasy habarlady.

— Beınerolıkterdi osy jyldyń qarashasynan bastap telearnalarda, kınoteatrlarda, LED-ekrandarda, qoǵamdyq oryndarda (saýda ortalyqtary, bıznes-ortalyqtar, metro, áleýmettik nysandar) jáne áleýmettik jelilerde kórsetý josparlanyp otyr, — dep habarlady basqarmadan.

Sondaı-aq vedomstvo málimetinshe, tótenshe jaǵdaılarǵa daıyndyqty arttyrý maqsatynda jyl basynan bastap 200-den astam erikti oqytylǵan. Olar qala halqyn tótenshe jaǵdaılar kezinde ózin-ózi qutqarý jáne ózgelerdi qutqarý daǵdylaryna úıretedi.

— Jyl sońyna deıin 1000-nan astam uıymdy qamtyp, olardyń jaýapty qyzmetkerlerin (memlekettik organdar, bilim berý uıymdarynyń oqýshylary, iri saýda ortalyqtarynyń qyzmetkerleri, páter ıeleriniń birlestigi) oqytý josparlanyp otyr. Qyrkúıek-qazan aılarynda eriktiler bilim berý uıymdarynda seısmıkalyq qaýipsizdik sabaqtaryn bastap ketti, barlyǵy 400 nysan qamtylatyn bolady, — delingen basqarma jaýabynda.

Eske salaıyq, buǵan deıin Almaty mektepterinde seısmıkalyq qaýipsizdik jóninde sabaq ótkizilýi múmkin ekenin jazǵanbyz.