Jer silkinisinen keıin Jambyl oblysynda jedel shtab quryldy
TARAZ. KAZINFORM – Seısmıkalyq belsendilikke baılanysty Jambyl oblysy Tótenshe jaǵdaılar departamentinde dereý oblystyq jedel shtab quryldy. Bul týraly QR Tótenshe jaǵdaılar mınıstrliginiń baspasóz qyzmeti habarlady.
Búgin Astana ýaqyty boıynsha saǵat 14:30-da Jambyl oblysy aýmaǵynda magnıtýdasy 5,5 baldyq jer silkinisi tirkeldi. Epıtsentri Almatydan ońtústik-batysqa qaraı 334 shaqyrym jerde ornalasqan. Jerasty dúmpýleri birneshe eldi mekende sezildi, kúshi 2-den 6 ballǵa deıin jetti.
Jambyl oblysy Tótenshe jaǵdaılar departamenti dereý oblystyq jedel shtab qurdy. Onyń mindeti – qyzmetterdiń jumysyn úılestirý, aqparat jınaý jáne yqtımal saldarǵa daıyndyq. Shtab quramyna TJD, polıtsııa, medıtsına, energetıka, kólik, bilim jáne basqa da qyzmetterdiń ókilderi kirdi. Sonymen qatar T.Rysqulov aýdany men Merki aýdanynda aýdandyq shtabtar bar.
Senim telefony ashyldy, oǵan saǵat 17:00-ge deıin 24 qońyraý tústi. Sondaı-aq TJD psıhologtary adamdarǵa kómektesip, keńes beredi.
Qutqarýshylar men jergilikti bılik eldi mekenderdi tekserýdi jalǵastyryp jatyr. Barlyq mańyzdy nysan, joldar men kásiporyndar qalypty jumys istep tur.
Tótenshe jaǵdaılar qyzmeti turǵyndardy resmı aqparatqa qulaq asýǵa jáne qaýipsizdik sharalaryn saqtaýǵa shaqyrady.
Eske sala keteıik, buǵan deıin Jambyl oblysynda jer silkinisi tirkelgenin jazǵan edik.