Jer silkinisi: jer asty mıkrodúmpýlerin anyqtaıtyn úsh qosymsha jyljymaly stantsııa ornatyldy
ASTANA. KAZINFORM – TJM seısmologtary Jambyl oblysynda monıtorıngti jalǵastyryp jatyr. Bul týraly TJM baspasóz qyzmeti habarlady.
Jambyl oblysyna kelgen Qazaqstan TJM Seısmologııalyq baıqaý jáne zertteý ulttyq ǵylymı ortalyǵynyń mamandary seısmıkalyq jaǵdaıdy egjeı-tegjeıli monıtorıngileý men taldaýdy jalǵastyryp jatyr.
— Seısmologııalyq stantsııalar jelisi Merki aýdanynda epıortalyq aımaǵynda ornalastyrylǵan. Trıangýlıatsııa ádisimen jumys isteıtin úsh qosymsha jyljymaly stantsııa ornatyldy. Olar epıortalyqtan 30-80 km radıýsta: jer qyrtysynyń qozǵalysyn, jer asty mıkrodúmpýlerdi jáne jer asty shýlardy anyqtaıdy, — delingen habarlamada.
Bul derekter yqtımal aftershok belsendiligin egjeı-tegjeıli zertteýge jáne yqtımal táýekelderdi baǵalaýǵa múmkindik beredi.
- Jınalǵan derekter jedel rejımde seısmıkalyq jaǵdaıdy baǵalaý jónindegi komıssııanyń taldaýy men jumysy úshin Ortalyq seısmıkalyq observatorııaǵa beriledi. Nátıjesinde qorytyndy daıyndalyp, Qazaqstan TJM Komandalyq ortalyǵyna jiberiledi. Bul naqty ýaqyt rejıminde jaǵdaıdy taldaýǵa jáne halyqtyń qaýipsizdigin qamtamasyz etý úshin qajetti sharalardy qabyldaýǵa múmkindik beredi, - delingen habarlamada.
Qazirgi ýaqytta Jambyl oblysynda TJM SBZǴO 9 seısmologııalyq stantsııasy jumys isteıdi, olardyń biri — keshendi, birneshe parametrlerdi taldaý múmkindigi bar. Qosymsha stantsııalar baqylaý dáldigin jaqsartady jáne seısmıkalyq belsendiliktiń ózgerýine jedel den qoıýǵa kómektesedi.
Qazaqstan TJM jaǵdaıdy baqylaýda ustap, azamattardyń qaýipsizdigin qamtamasyz etý úshin barlyq qajetti sharalardy qabyldap jatyr.
Eske salsaq, jer silkinisi boıynsha 104 aryz-shaǵym túsip, 17 áleýmettik nysan búlingen.
Aıta ketelik Jambyl oblysynda jer silkinisiniń saldaryn baǵalaý jónindegi úkimettik toptyń jumysy jalǵasyp jatqanyn jáne Úkimettik jumys toby jer silkinisinen zaqymdanǵan nysandardy aralaǵany týraly jazǵan edik.
Eske sala keteıik, buǵan deıin Almatydan 323 shaqyrym jerde jer silkinisi tirkelgenin jazǵan bolatynbyz. Eseptelgen qarqyndylyǵy Merki aýylynda — 5.0 ball, Qulan aýylynda — 4.0 ball, Shý qalasynda — 2.0 ball shamasynda bolǵan.
Buǵan deıin habarlanǵandaı, seısmıkalyq ahýaldy baqylaý jónindegi jedel shtab 24/7 tártibinde jumys istep jatyr.