Jer silkinisi týraly jalǵan aqparat bergeni úshin aıyppul arqalady
ASTANA. KAZINFORM – Almaty prokýrorlary jer silkinisi týraly jalǵan aqparat úshin jaýapqa tartýdyń alǵashqy faktileri týraly habarlady. Bul týraly QR Bas prokýratýrasy habarlady.
Jer silkinisinen keıin ártúrli áleýmettik jeliler jáne messendjer chattarynda tabıǵı apattyń saldary týraly kórineý jalǵan habarlama taratý faktileri tirkeldi. Bul óz kezeginde azamattardy dúrbeleńge salyp, keń qoǵamdyq rezonans týdyrdy.
Mundaı áreketterdi jasaý faktileri boıynsha qazirgi ýaqytta 1995 jáne 2006 j.t. eki áıeldiń jeke basy anyqtaldy.
Atalǵan tulǵalar Qazaqstan Respýblıkasynyń Ákimshilik quqyq buzýshylyq týraly Kodeksiniń 456-2-babynyń 3-bóligi (onlaın-platformalardy paıdalanýshylardyń qoǵamdyq tártiptiń, azamattardyń nemese uıymdardyń quqyqtary men zańdy múddeleriniń ne qoǵamnyń nemese memlekettiń zańmen qorǵalatyn múddeleriniń buzylýyna jaǵdaı jasaıtyn jalǵan aqparatty ornalastyrýy, taratýy, eger bul áreketterde qylmystyq jazalanatyn is-áreket belgileri bolmasa) boıynsha 10 aılyq eseptik kórsetkish mólsherinde aıyppul túrinde jaza qoldanýmen ákimshilik jaýaptylyqqa tartyldy.
Bul baǵyttaǵy jumys jalǵasýda.
