Jer silkinisi: Tájikstanda 100-ge jýyq úı qırap, bir bala kóz jumdy

ASTANA. KAZINFORM – 13 sáýirde elde bolǵan jer silkinisi saldarynan Tájikstannyń eki aýdanynda 100-ge jýyq turǵyn úı qırap, taǵy birneshe ondaǵan ǵımarat zaqymdanyp, bir bala qaza tapty. Bul týraly eldegi Tótenshe jaǵdaılar jáne azamattyq qorǵanys komıtetiniń (TJK) Daǵdarysty basqarý ortalyǵy habarlady, dep jazady TASS.

Habarlamada Rasht aımaǵynyń bes aýylynda 40 turǵyn úı tolyǵymen qıraǵany, 5 turǵyn úı, 3 shaıhana jáne 1 qosalqy mektep ǵımaraty jartylaı qıraǵandyǵy atap kórsetilgen.
Sonymen qatar, Úshturpast aýylynda úsh jasar balany úıdiń qabyrǵasy basyp qalyp, mert bolǵan.

Aıta keteıik, 13 sáýirde Tájikstanda eki ret jer silkingen. Alǵashqysy jergilikti ýaqyt boıynsha 09:24-te tirkeldi. Magnıtýdasy 5,8. Onyń kórshiles Ózbekstan aýmaǵyna áser etkeni, Tashkentte 2 balldyq kúshpen jerasty dúmpýleri sezilgeni aıtyldy.

Ekinshi jer silkinisi jergilikti ýaqyt boıynsha 12:14-te boldy. EMSC mamandary jer silkinisiniń magnıtýdasyn 4,2 dep baǵalady.

Eýropa-Jerorta teńizi seısmologııalyq ortalyǵy (EMSC) 14 sáýirge qaraǵan túni, UTC 0:44 (Qazaqstan ýaqytymen 5:44) kezinde Tájikstanda magnıtýdasy 4,5 baldyq taǵy bir jer silkinisi tirkelgenin málimdedi.

Buǵan deıin Tájikstandaǵy jer silkinisinen 29 úı men mektep zaqymdanǵanyn jazdyq.