Jer silkinisi: Ońtústik óńirlerde gaz qubyrlarynyń jarylý qaýpi bar
ASTANA. KAZINFORM – « QazTransGaz Aımaq» AQ elimizdiń ońtústik óńirlerinde gaz qubyrlarynyń jarylý qaýpi bar ekendigin málimdedi.
«Almaty, Taldyqorǵan, Shymkent qalalaryn, sondaı-aq Jambyl jáne Túrkistan oblystaryn qamtyǵan jer silkinisi saldarynan «QazTransGaz Aımaq» AQ gaz qubyrlarynyń jarylýy men gazdyń aýaǵa taralýy sııaqty oqıǵalardyń oryn alý qaýpi týyndaýda. Bul óńirlerde «QazTransGaz Aımaq» AQ mamandary jer dúmpýi oryn alǵan sátten bastap gaz qubyrlary men jabdyqtaryn muqııat tekserip jatyr. Jer silkinisiniń alǵashqy kúni Túrkistan oblysy Ordabasy aýdany Qaınar eldi mekeninde ortasha qysymdy jerasty gaz qubyrynda gazdyń aýaǵa taralyp jatqany anyqtalǵan. Saldarynan Ordabasy aýdanynyń 7 eldi mekenine gaz berý ýaqytsha toqtatylyp, shuǵyl túrde jóndeý jumystary júrgizildi. Turǵyndar kóp uzamaı kógildir otynmen qaıta qamtamasyz etildi», - dep atap ótedi kompanııadan.
Jer silkinisinen keıingi aldyn alý jumys retinde «QazTransGaz Aımaq» AQ mamandary «Intergaz Ortalyq Azııa» AQ-taǵy áriptesterimen birlesip, Almaty óndiristik fılıalynyń gaz tasymaldaý jáne taratý júıeleriniń, jerasty gaz qudyqtarynyń jaǵdaıyn tekseristen ótkizgen.
«Osyndaı shuǵyl is-qımyldardyń arqasynda keshe Almatyda gazdyń aýaǵa taralýyn jedel anyqtaıtyn «DLS-Pergam» mobıldi zerthanasy ortasha qysymdy jerasty gaz qubyrynan gazdyń aýaǵa taralyp jatqanyn anyqtady. Gaz qubyryndaǵy aqaýdy qalpyna keltirý úshin 170 jeke úı kógildir otynnan ýaqytsha ajyratyldy. «QazTransGaz Aımaq» AQ mamandary túni boıy barlyq shuǵyl jumystardy atqaryp, tań ata abonentterge qaıtadan gazdy qosa bastady. Osylaısha aýaǵa gaz taraǵany anyqtalǵan jaǵdaıda aqaýly oryndy jóndeý úshin sol aýmaqtaǵy gaz tutynýshylary ýaqytsha «kógildir otynnan» ajyratylady. Gazdyń eskertilmeı óshirilýine, ıaǵnı mundaı májbúrli túrde ajyratylýyna turǵyndardan túsinistikpen qaraýdy ótinemiz», - dep naqtylaıdy mekemeden.
