Jer silkinisi: Qazaqstan Aýǵanstanǵa gýmanıtarlyq mıssııa jiberedi
ASTANA. KAZINFORM — Aýǵan tarapynyń bastamasymen Qazaqstan Respýblıkasynyń Syrtqy ister mınıstri Ermek Kósherbaev Aýǵanstan Syrtqy ister mınıstri Ámir Han Mýttakımen telefon arqyly sóılesti, dep habarlaıdy QR SІM baspasóz qyzmeti.
— Suhbat barysynda E.Kósherbaev taıaýda bolǵan joıqyn jer silkinisterine baılanysty aýǵan halqyna kóńil aıtyp, aldaǵy ýaqytta Qazaqstan tarapynan Qabylǵa gýmanıtarlyq mıssııa jiberiletinin habarlady. Mıssııa quramyna medıtsınalyq mamandarmen qatar dári-dármekter men alǵashqy qajettilik zattary kiretin bolady. Á.Mýttakı aýǵan halqynyń muqtajdyqtaryna árdaıym kóńil bólip, turaqty qoldaý kórsetip kele jatqan qazaq tarapyna rızashylyǵyn bildirdi jáne bıyl jalpy kólemi 3,7 myń tonnany quraǵan eki partııa gýmanıtarlyq kómektiń jiberilgenin atap ótti, — delingen vedomstvo habarlamasynda.
Taraptar ekijaqty jáne kópjaqty yntymaqtastyqtyń negizgi baǵyttaryn talqylap, dostyq jáne ózara tıimdi qatynastardy odan ári nyǵaıtýǵa daıyn ekenin rastady. Suhbat barysynda saýda, bank, taý-ken metallýrgııasy men tsıfrlyq tehnologııalar salalaryndaǵy yntymaqtastyqqa erekshe nazar aýdaryldy.
Kelissózder qorytyndysy boıynsha mınıstrler qazaq-aýǵan yntymaqtastyǵyn dáıekti damytý nıetin rastap, belsendi saıası dıalogty jalǵastyrý jóninde ýaǵdalasty.
Budan buryn Aýǵanstanda 6,3 magnıtýdaly jer silkinisi saldarynan keminde 20 adam qaza taýyp, jaralanǵandar sany 320-dan asqany belgili boldy.