Jer silkinisi: arnaıy komıssııa shyǵyndy anyqtaý jumystaryn júrgizedi
ASTANA. KAZINFORM – Jambyl oblysynyń ákimi Erbol Qarashókeev jer silkinisi bolǵan Merki jáne Turar Rysqulov aýdandarynda bolyp, tótenshe jaǵdaılar jónindegi jedel shtabtyń otyrysyn ótkizip, búlingen nysandardy aralady. Bul týraly Jambyl oblysy ákimdiginiń baspasóz qyzmeti habarlady.
— Merki aýdandyq ortalyq aýrýhanasynyń, Merki aýyldyq okrýgindegi «Baldáýren» balabaqshasynyń ǵımarattarynda jáne Taldybulaq aýylyndaǵy turǵyn úıdiń ashanasynda qabyrǵa jaryqshaq anyqtaldy. Turar Rysqulov aýdany Abaı aýylyndaǵy turǵyn úıdiń, Jańaturmys aýylyndaǵy — 6 baspananyń, aýyldyq mekteptiń, Qaraqystaq aýyldyq okrýginiń Kamenka aýylyndaǵy mádenıet úıiniń qabyrǵalarynda jaryqshaq paıda bolǵan, — delingen habarlamada.
Turar Rysqulov aýdanynda 20-dan astam zaqymdanǵan ǵımarat tirkeldi. Olardyń ishinde 10 áleýmettik nysan bar: 4 mektep, 3 balabaqsha, mádenıet úıi, medıtsınalyq pýnkt jáne sport kesheni, sondaı-aq 11 turǵyn úı.
Qurbandar týraly aqparat túsken joq.
Óńirde jedel jeli jumys istep tur, oǵan qazirge deıin 12 qońyraý shalynǵan. Negizinen, turǵyndar qaıtalama jerasty dúmpýleriniń bolýy múmkin be degen suraq qoıyp jatyr, alaıda mamandar qaýiptiń seıilgenin málimdedi.
Jambyl oblysynda ǵımarattardy tekserý úshin 120 adam men 73 arnaıy tehnıka jumyldyryldy. TJM Ulttyq seısmologııalyq monıtorıng ǵylymı ortalyǵynyń ókilderi de kirgen komıssııa jumysyn jalǵastyryp jatyr.
— «Merki irimshik zaýyty» hımııalyq qaýipti nysanynda shamamen 250 kg ammıak saqtalǵan, biraq eshqandaı zaqym anyqtalǵan joq. Zardap shekken aımaqta bıologııalyq nemese radıatsııalyq qaýipti basqa nysandar joq. Barlyq tirshilikti qamtamasyz etý júıeleri, gaz tasymaldaý ınfraqurylymy jáne qaýipti óndiris oryndary qalypty rejımde jumys istep tur. Jol qatynasy, temirjol jelileri, shahtalar men ken oryndarynda da eshqandaı zaqym tirkelmedi, — dedi Jambyl oblysy ákiminiń orynbasary Qanatbek Mádıbek.
Arnaıy komıssııa oblys ákiminiń tapsyrmasy boıynsha keltirilgen shyǵyndy anyqtaý jumystaryn júrgizedi. Onyń quramyna Tótenshe jaǵdaılar mınıstrligi Seısmologııalyq baıqaý jáne zertteýler ulttyq ǵylymı ortalyǵynyń ókilderi kiredi.
— Aýdandardaǵy nysandardy mamandar aralap, ahýaldy kózben kórdi. Merki aýdanynda aınalma joldarǵa 55 adam, 33 tehnıka, Turar Rysqulov aýdanynda 65 adam, 40 tehnıka jumyldyryldy, — delingen habarlamada.
«KAJservıs» JShS oblystyq fılıalynyń qyzmetkerleri (25 adam, 19 tehnıka) Merki jáne Turar Rysqulov aýdandaryndaǵy respýblıkalyq mańyzy bar avtomobıl joldarynyń (5 kólik aıyryǵy, 2 temirjol ótkeli jáne 3 kópir) jaı-kúıin tekserilip jatyr. 45 eldi meken zertteldi.
Qyrǵyz Respýblıkasynyń Tótenshe jaǵdaılar mınıstrligimen ózara is-qımyl kezekshi bólim arqyly uıymdastyryldy.
Shoń-Qaqpa jáne Orto-Toqaı sý qoımalary qalypty jumys istep tur.
Aıta ketelik Jambyl oblysyndaǵy jer silkinisine baılanysty jedel shtab jumys istep jatqany týraly habarlaǵan edik.