Jer silkinisi: 104 aryz-shaǵym túsip, 17 áleýmettik nysan búlingen
TARAZ. KAZINFORM – Sońǵy málimetter boıynsha eki aýdanda 17 áleýmettik nysan búlingen. Onyń ishinde 11 bilim berý, 2 - densaýlyq saqtaý, 2 - áleýmettik qorǵaý, 1 - sport jáne 1 - mádenıet nysany bar. Bul týraly Jambyl oblysy ákimdiginiń baspasóz qyzmeti habarlady.
Jambyl oblysynyń ákimi Erbol Qarashókeev pen tótenshe jaǵdaılar vıtse-mınıstri Kegen Tursynbaev bastaǵan úkimettik komıssııa T.Rysqulov aýdanyndaǵy zardap shekken turǵyn úıler men áleýmettik nysandardy aralap shyqty.
Jańaturmys aýylynda aımaq basshysy komıssııamen birge 5 úıdi aralap, jaǵdaıyn baǵamdady. Aýyl turǵyndarymen áńgimelesý barysynda Erbol Qarashókeev úıleri zardap shekken turǵyndarǵa ataýly kómek kórsetiletinine sendirdi.
Aýyl mektebi ǵımaratynyń da búlingen jerleri anyqtaldy. Oblys ákimi balalarǵa qolaısyzdyq týǵyzbas úshin qalpyna keltirý jumystaryn jedel bastaý mindetin qoıdy.
Memleket basshysynyń tapsyrmasyna sáıkes zalaldy baǵalaý jáne búlingen múlikti qalpyna keltirý boıynsha keshendi jumystar júrgiziletin bolady. Quramyna oblys ákimdiginiń, seısmologııalyq baqylaý jáne zertteýlerdiń ulttyq ǵylymı ortalyǵynyń, sondaı-aq túrli mınıstrlikter men vedomstvolardyń ókilderi kiretin jumys toby quryldy.
Merki jáne T.Rysqulov aýdandarynyń aýyldyq eldi mekenderinde komıssııa músheleri ǵımarattar men turǵyn úılerdi aralap, jaı-kúıin kózben kórip, tehnıkalyq tekserý júrgizedi.
— Sońǵy málimetter boıynsha eki aýdanda 17 áleýmettik nysan búlingen. Onyń ishinde 11 bilim berý, 2 — densaýlyq saqtaý, 2 — áleýmettik qorǵaý, 1 — sport jáne 1 — mádenıet nysany bar, — delingen habarlamada.
Aýyldyq okrýg ákimdikterine turǵyndardan baspanalardyń zardap shekkeni týraly 104 aryz-shaǵym túsken. Turǵyn úılerdi tekserý jalǵasyp, shyǵyn kólemi anyqtalyp jatyr.
Aralaý jáne atqarylǵan jumystardyń qorytyndylary oblystyq jedel shtabtyń otyrysynda talqylandy.
Qazirgi ýaqytta oblystaǵy jaǵdaı turaqty. Zardap shekkender joq. Áleýmettik jáne tirshilikti qamtamasyz etý nysandaryndaǵy, jol kommýnıkatsııalary, ónerkásiptik kásiporyndardaǵy jaǵdaı oblys basshylyǵynyń erekshe baqylaýynda.
Aıta ketelik Jambyl oblysynda jer silkinisiniń saldaryn baǵalaý jónindegi úkimettik toptyń jumysy jalǵasyp jatqanyn jáne Úkimettik jumys toby jer silkinisinen zaqymdanǵan nysandardy aralaǵany týraly jazǵan edik.
Eske sala keteıik, buǵan deıin Almatydan 323 shaqyrym jerde jer silkinisi tirkelgenin jazǵan bolatynbyz. Eseptelgen qarqyndylyǵy Merki aýylynda — 5.0 ball, Qulan aýylynda — 4.0 ball, Shý qalasynda — 2.0 ball shamasynda bolǵan.
Buǵan deıin habarlanǵandaı, seısmıkalyq ahýaldy baqylaý jónindegi jedel shtab 24/7 tártibinde jumys istep jatyr.