Jer silkingende Almatydaǵy metro qanshalyqty qaýipsiz
ASTANA. KAZINFORM – Almaty qalasynyń metropolıteni nysandaryn jobalaý jáne salý kezinde jolaýshylar men qyzmetkerlerdiń qaýipsizdigin qamtamasyz etý úshin barlyq qajet talaptar oryndalǵan. Qurylystar túrli baǵyttaǵy seısmıkalyq tolqyndardyń yqtımal saldaryn eskere otyryp jobalanǵan. Bul týraly Kazinform agenttiginiń resmı saýalyna jaýap bergen Almaty metropolıteniniń baspasóz qyzmeti habarlady.
«Týnnelder men tereńdegi qurylystardyń, ıaǵnı tireý jáne qorshaý konstrýktsııalary seısmıkalyq tolqyndardyń qysymyna tótep berýge arnalǵan», - delingen Almaty qalasy metropolıteni málimetinde.
Qurylys kezinde metro aýmaǵynyń 9 baldyq seısmıkalyq deńgeıi eskerildi. Jer silkingende bolatyn terbelis kezinde týnnelderdiń bel ortasy boıymen deformatsııanyń aldyn alý úshin búkil jeli boıymen, sondaı-aq basqa da jerasty nysandarda seısmıkaǵa qarsy arnaıy deformatsııalyq jikter qarastyrylǵan.
Kompanııa aqparatyna qaraǵanda, metro qurylys qurylymdary men jelilerdiń tıisti parametrlerden aýytqýyn erte kezeńde anyqtaýǵa múmkindik beretin avtomattandyrylǵan baqylaý júıesi jumys istep tur.
«Apparattyq-baǵdarlamalyq keshende túıisetin nysandardy ólsheıtin qurylǵylar, qysym datchıkteri, tenzometrler, týnnel tóseminiń jyljýyn ólsheýge arnalǵan datchıkter, eki osti eńis ólsheýishi, eki núkteli uńǵyma ekstenzometri, derekterdi jınaý jáne óńdeý júıeleri qamtylǵan», - dep atalyp ótken metropolıten aqparatynda.
Metro qyzmetkerleri apatty joıý josparyna qatysty turaqty túrde oqý-jattyǵýǵa, tájirıbelik sabaqtarǵa qatysyp turady. Josparda qyzmetkerler ózderiniń mindetterin oryndaý barysynda adam shyǵyny men materıaldyq zalal keltirmeý is-áreketteri qamtylǵan. Tótenshe jaǵdaı bolǵanda jolaýshylar sabyr saqtap, metro qyzmetkerleriniń nusqaýlaryn oryndaýy kerek. Jolaýshylar men qyzmetkerlerdi shyǵatyn jolǵa baǵyttaý úshin evakýatsııalaý josparlary men jaryqtandyratyn baǵyt belgileri ornatylǵan.
Eske salsaq, 2022 jyly Memleket basshysy Almatyda metropolıten jelisin keńeıtýdi tapsyrǵan edi.
