Jer silkinisiniń oshaǵy tereńdegen saıyn onyń qýaty da arta túsedi - ǵalym pikiri
ALMATY. QazAqparat- Jer silkinisiniń oshaǵy tereńdegen saıyn onyń qýaty da arta túsedi. Bul týraly búgin Almatyda Halyqaralyq «Shekarasyz jer silkinisi» jobasy aıasynda ótken ashyq ǵylymı dáris barysynda Kembrıdj (Ulybrıtanııa) ýnıversıtetiniń professory Djeıms Djekson málim etti.
Onyń aıtýynsha, Tıan-Shan taý tizbeginde ádette jerasty dúmpýleriniń oshaqtary tereńde ornalasqan. Demek, bul aımaqta kúshti jer silkinisiniń bolýy yqtımal.
«30-40 shaqyrym tereńdikten shyǵatyn jer silkinisteriniń qýaty joıqyn bolyp keledi. Almaty seısmıkalyq qaýipti aımaqta ornalasqan. Bul jerde jer silkinisine daıyn bolý, onyń tabıǵatyn túsiný úshin jańa ádisterdi, tehnologııalardy qoldaný asa mańyzdy. Ásirese ǵaryshtyq tehnologııaǵa arqa súıeýge bolady. Árıne, jer silkinisi tektonıkalyq jarylymdardyń qozǵalysynan týyndaıdy. Sol jarylymdarda jer qyrtysynyń bir jaǵy tómen túse, ekinshi jaǵy joǵary kóteriledi. Mine, jer silkinisinen keıin ózgeriske ushyraǵan jer bederin jer serigine ornatylǵan radarlyq tehnologııa arqyly tereń zerttep bilýge bolady. Bul zilzalanyń tabıǵatyn uǵynýǵa kóp septigin tıgizedi», - dedi óz sózinde ǵalym.
Ashyq dáriske ǵalymdar men stýdentter, geologııa jáne seısmologııa salasynyń mamandary qatysty.
Ashyq dáristi ótkizýdegi basty maqsat - zilzalanyń qaýiptiligine jurtshylyq nazaryn aýdarý jáne atalmysh halyqaralyq joba boıynsha ǵylymı-zertteý jumystaryna jas mamandardy kóptep tartý.
