Jer silkinisiniń qaıtalanýy týraly aqparat jalǵan - TJD

TÚRKІSTAN. QazAqparat- Túrkistan oblysy TJD jer silkinisiniń qaıtalanýy týraly aqparattyń jalǵan ekendigin málimdedi, dep habarlaıdy QazAqparat tilshisi.

Áleýmettik jelide jer silkinisiniń qaıtalanatyndyǵy týraly aqparat tarady. Onda ózin Myrzakenttegi áskerı bólim qyzmetkerimin dep tanystyrǵan er adam jer silkinisiniń qaıtalanatyndyǵyn aıtqan. Tipti, jer silkinisi kúshti bolatyndyǵyn eskertip, qajetti qujattardy alyp, uıyqtamaı kútip otyrý kerektigin habarlaǵan.

Al, Túrkistan oblysynyń TJD múmkin bolatyn jer silkinisi týraly aqparat jalǵan ekendigin málimdedi.

«Turǵyndardan úreılenbeı tynyshtyq saqtaýdy, tek resmı aqparatty oqýyn suraımyz», - delingen aqparatta.

Arada jarty saǵat ótkende jalǵan aqparat taratqan Maqtaaral aýdandyq Shekara basqarmasynyń kelisim shart boıynsha qyzmetkeriniń kópshilikten keshirim suraǵan aýdıosy tarady. Qatty qorqyp qalǵanyn aıtqan ol tek týystaryna ǵana eskertpek bolǵanyn jetkizgen.

Jer silkinisinen Túrkistan qalasynyń da turǵyndary úreılenip qalǵan. Túngi mezgilge qaramastan, qala ákiminiń orynbasary Baıdýlla Orazbekov jáne qalalyq tótenshe jaǵdaılar jónindegi basqarma men polıtsııa basqarmasynyń ókilderi kópqabatty úılerdiń aýlalaryn aralap, turǵyndarǵa túsindirý sharalaryn júrgizýde.

Jer silkinisine qatysty Tótenshe jaǵdaı qyzmetiniń málimdemesinen tys taralǵan habarlamalardyń shyndyqqa janaspaıtynyn aıtyp, úreıge boı aldyrmaýǵa shaqyrdy.

Aıta keteıik, budan buryn Aýǵanstandaǵy jer silkinisi Taraz ben Shymkentke sezilgenin jazǵan bolatynbyz.