Jer silkinisinen zardap shekken provıntsııalarda 13,5 mln adam turady – Túrkııa elshisi

ASTANA. QazAqparat – Túrkııa Respýblıkasynyń Qazaqstandaǵy Tótenshe jáne ókiletti elshisi Ýfýk Ekıdjı eldiń ońtústik-shyǵysyndaǵy jer silkinisi 13,5 mıllıonǵa jýyq adam turatyn aýmaqty qamtyǵanyn aıtty, dep habarlaıdy QazAqparat tilshisi.

Bul týraly ol Astanadaǵy elshilikte ótken brıfıngide málim etti.

Elshi sóziniń basynda Qazaqstan Prezıdenti Qasym-Jomart Toqaevtyń búgin elshilikke kelip, kóńil aıtqanyn eske saldy. Sondaı-aq, ol Túrkııadaǵy qazirgi aýhal týraly resmı málimet berý úshin osy brıfıngini uıymdastyrǵandaryn jetkizdi.

«Sońǵy ret Túrkııada osyndaı joıqyn jer silkinisi 100 jyldaı ýaqyt buryn bolǵan edi. Aqparat túsken sátten bastap el prezıdenti, basqa da úkimet ókilderi qajetti uıymdastyrý jumystaryn dereý qolǵa aldy. Túrkııada barlyǵy 648 silkinis tirkelgen.

Bul silkinister eldegi 10 provıntsııaǵa áser etken. Bul provıntsııalarda 13,5 mıllıonǵa jýyq adam turady. Jer silkinisteriniń aýqymy 1 myń sharshy shaqyrymǵa jýyq», - dedi elshi.

Búgin Prezıdent Qasym-Jomart Toqaev Túrkııa Respýblıkasynyń Qazaqstandaǵy elshiligine kelip, baýyrlas eldiń ońtústik-shyǵysynda bolǵan alapat zilzala saldarynan myńdaǵan adamnyń qaza tabýyna baılanysty kóńil aıtty.

Anadoly agenttiginiń málimetinshe, Túrkııadaǵy eki joıqyn jer silkinisinen qaza tapqandar sany 6234-ke jetip, 37 011 adam jaraqat alǵan.

Sońǵy málimetter boıynsha, Túrkııada úsh qazaqstandyq izdestirilip jatyr.

Foto: aa.com.tr