Jer silkinisinen 156 myń ǵımarat qıraǵan - Túrkııa elshisi

ASTANA. QazAqparat – Búginge deıin jer silkinisinen qıraǵan jáne qulaý aldynda turǵan 156 myń ǵımarat anyqtaldy. Bul týraly elshilikte ótken brıfıngide Túrkııa Respýblıkasynyń Qazaqstandaǵy Tótenshe jáne ókiletti elshisi Ýfýk Ekıdjı aıtty, dep habarlaıdy QazAqparat tilshisi.

«Túrkııada qazir ǵımarattarǵa keltirilgen zalaldy anyqtaý jumystary jalǵasyp jatyr. Búginge deıin 1 mln 188 myńǵa jýyq ǵımarat zertteldi. Onyń ishinde 156 myń ǵımarat qıraǵan nemese qulaý qaýipiniń aldynda tur», - dep málim etti elshi.

Qosa keteıik, ol sonymen birge Túrkııa halqyna kómek retinde qazaqstandyqtar 5 mln dollar jınaǵanyn aıtty. Ýfýk Ekıdjı qoldaý bildirgen el Úkimeti men barsha azamattarymyzǵa alǵys bildirdi.

Eske salaıyq, 6 aqpanda Kahramanmarashta magnıtýdasy 7 baldan asatyn eki jer silkinisi boldy. Jerasty dúmpýleri eldiń 10 provıntsııasynda, sondaı-aq kórshiles memleketterde, sonyń ishinde Sırııada da sezildi.

Qazaqstandyqtar zilzaladan zardap shekken Túrkııa halqyna kómek kórsetý úshin 5 mln dollar jınady.