Jer silkinisi aımaǵyndaǵy oqýshylar naýryzda sabaqqa barady - Túrkııa Elshisi

ASTANA. QazAqparat – Zilzala bolǵan aımaqtardaǵy balalardy oqytý naýryz aıynda qaıta bastalady. Elshilik qabyrǵasynda ótken brıfıngide Túrkııa Respýblıkasynyń Qazaqstandaǵy Tótenshe jáne ókiletti elshisi Ýfýk Ekıdjı osylaı málimdedi, dep habarlaıdy QazAqparat tilshisi.

«Túrkııa boıynsha mektepter 20 aqpan kúni qaıta ashyldy. Jer silkinisi bolǵan óńirlerde ýaqytsha mektepter qurý jumystary júrip jatyr. Al, naýryzda zilzala bolǵan aımaqtarda oqýdy qaıta bastaý josparlanyp otyr. Osy aımaqtan basqa óńirlerge kóshken balalardy da oqytý jalǵasady», - dep toqtaldy Ýfýk Ekıdjı.

Ol qazirgi tańda zilzaladan zardap shekken 1,6 mln Túrkııa azamatynyń baspana máselesi sheshilgenin málimdedi.

Sonymen qosa, búginge deıin jer silkinisinen qıraǵan jáne qulaý aldynda turǵan 156 myń ǵımarat anyqtalǵan.

Buǵan qosa, Túrkııa halqy jetim qalǵan balalardy asyrap alýǵa nıet bildirip jatyr.

Eske salaıyq, 6 aqpanda Kahramanmarashta magnıtýdasy 7 baldan asatyn eki jer silkinisi boldy. Jerasty dúmpýleri eldiń 10 provıntsııasynda, sondaı-aq kórshiles memleketterde, sonyń ishinde Sırııada da sezildi.