Jer sheteldiktiń menshigine berilmeıtini Prezıdenttiń maqalasynda taǵy da rastaldy - sarapshy
«2021 jyly elimiz qasıetti Táýelsizdiginiń 30 jyldyǵyna nyq qadam basty. Táýelsizdiktiń 30 jyldyǵy – bul halqymyzdyń mańdaı terimen jetken jetistikteriniń rámizi, sonymen birge - jańa tarıhı syn. Osy ýaqyt ishinde halyqtyń erkin sanasy qalyptasyp, egemen eldiń jańa da jasampaz urpaǵy ósti. Qazaqstan álemde mártebeli memleket retinde ornyqty. Árıne, bul ýaqyt ishinde maqtanýǵa turatyn, memlekettigimizdi nyǵaıtyp, búkil álemge pash etýge laıyqty talaı aýqymdy ister jasaldy. Degenmen, Táýelsizdik osy otyz jylmen shektelmeıdi. Oǵan jetýdiń tarıhy, qazaǵymyzdyń kórgen qasireti bir jaǵynda tursa, ekinshi jaǵynda eldigimizdi, egemendigimizdi saqtap, ony keleshek urpaq úshin nyǵaıtý isiniń turǵany sózsiz», - deıdi Mádına Bektenova.
Onyń aıtýynsha, Memleket basshysy Qasym-Jomart Toqaev «Táýelsizdik bárinen qymbat» atty maqalasynda Táýelsizdiktiń qadiri men qundylyǵyn, ony saqtaýdaǵy baǵdar-belesterdi aıqyndap bergen.
«Prezıdent memleketimizdiń otyz jylda ótkergen belesterdi tizgindep, olardyń árqaısysy atqarǵan mıssııasy turǵysynan ǵasyrdyń júgin arqalap turǵanyna nazar aýdardy. «Kóregen basshy eldi ósiredi» demekshi, Qazaqstannyń memleket bolyp, keregesiniń keńeıýi jolyndaǵy Elbasynyń dara kóshbasshylyǵynyń mańyzyna aıyryqsha toqtaldy.
Sonymen qatar Memleket basshysy sońǵy ýaqytta aýmaqtyq tutastyǵymyzǵa kúmán keltirip, tatý kórshilik qatynastarǵa syna qaqqysy keletin keıbir shetel azamattarynyń arandatýshylyq is-áreketterine de jaýap bere otyryp, bizdiń ekijaqty kelisimdermen bekitilip, halyqaralyq deńgeıde tanylǵan shekaramyzdyń bar ekenin basa aıtty. Tipti, 2018 jyly Kaspıı teńiziniń quqyqtyq mártebesi týraly konventsııaǵa qol qoıylǵannan keıin qurlyqtaǵy ǵana emes, teńizdegi shekaramyz da birjola aıqyndalyp, túpkilikti sheshilgeni de belgili. Sondaı-aq azamattarmyzdy kópten mazalap júrgen jer máselesi boıynsha da naqty jaýap retinde qazaqtyń jeri eshbir sheteldiktiń menshigine berilmeıtini, eshqashan satylmaıtyny Prezıdenttiń maqalasynda taǵy da rastaldy», - dedi Mádına Bektenova.
Onyń pikirinshe, birlikti el buzylmas, sondyqtan memleketimizdi birtutas dep bilýimiz jáne tanytýymyz qajet.
«Ol úshin aımaqtarymyzdy soltústik, ońtústik, batys, shyǵys dep bóle bermeı, tarıhı, mádenı mańyzdy ataýlardy engizý de mańyzdy. Árıne, ony Memleket basshysy aıtqandaı, baıyppen, oılanyp júzege asyrý kerek.
Ár qazaq úshin atalarymyzdyń qany men teri tamǵan bir ýys topyraqtyń ózi – esebi joq baılyq. Alaıda bul jerdi durys paıdalaný, qadirin bilip qasterleý, shynaıy otansúıgishtikti qalyptastyrý – kezek kúttirmeıtin úlken jumys. Jahandaný men aqparattyq damý zamanynda eldiń jat jurttyń ıdeologııalyq yqpalyna tez ilesip ketýi beleń alýda. Ásirese jastar bul qaýiptiń aldynda turǵany anyq. Buǵan tótep berýdiń joly – jańa zamanǵa saı bilim men básekege qabilettilikti, artyqshylyqtardy boıǵa sińirýmen qatar, tamyrymyzdy, ulttyq bolmysymyzdy berik saqtaý kerek», - dedi Mádına Bektenova.
Jetekshi ǵylymı qyzmetkerdiń aıtýynsha, aldaǵy tórtinshi onjyldyqtyń bizge júkteıtin mindeti – qýatty eldiń ıesi jáne kemel halyq bolý. Bul jolda saıası-ekonomıkalyq reformalardy jáne sanany jańǵyrtý úderisin jalǵastyryp, zaman talabyna beıimdelgen ulttyń jańa bolmysyn qalyptastyrýymyz qajet.
«Ulttyń jańa bolmysy ótkendi bilýden, dáripteýden bastalady. Táýelsizdik qundylyǵy halqymyzdyń jadynda máńgi saqtalýy úshin óskeleń urpaq onyń qadirin bilýi kerek. Bul rette, tarıhı jadynyń orny erekshe. Táýelsizdigimizdiń 30-jyldyǵymen qatar, bul egemendikke jetkizgen qaıǵy-qasiretke toly tarıhı oqıǵalardy umytpaǵan jón. Mıllıondaǵan adamdy qazaǵa ushyratyp, tiri qalǵanyn jan saýǵalap bosyp ketýge májbúr etken alapat asharshylyqtyń alǵashqy kezeńi – 1921-1922 jyldardaǵy náýbetten beri 100 jyl ótti. 1986 jyly ul-qyzdarymyzdy Sovet odaǵynyń qaharynan qaımyqpaı, ult namysy úshin alańǵa shyǵarǵan Jeltoqsan oqıǵasyna da 35 jyl tolady. Bunyń bári bizdiń tarıh. Memlekettiligimiz týraly tis jaryp otyrǵandardyń aýzyna qum quıý úshin myńdaǵan ǵasyrlarǵa sozylǵan tarıhymyzdyń, álemniń jartysyna ıe bolǵan alyp memlekettik qurylystyń, azattyq úshin soǵystardyń, batyrlar jyrlaryn, Alash qozǵalysynyń baǵdarlamalaryn, jalpy ult shejiresin jappaı qaıta qarap, ony óz elimizben qatar búkil álemge jańa aqparattyq tetikter arqyly pash etý – mańyzdy mindet», - deıdi jetekshi ǵylymı qyzmetkeri.
qatar, tamyrymyzdy, ulttyq bolmysymyzdy berik saqtaý kerek», - dedi Mádına Bektenova el birliginiń, ult namysynyń ajyramas bóligi – ol til ekenin atap ótti.
«Memleket basshysy qazaq tiliniń mártebesin erekshe aıtyp, memlekettik tildi kópshiliktiń úırenýi jónindegi óz úndeýin naqty jetkizdi. Memlekettik tildi bilý - ár azamat úshin paryz. Ol úshin elde barlyq jaǵdaı jasalýda, qalǵany ár adamnyń óz nıetinde. Nıettiń durys bolýy qazaq tilin meńgergisi keletin adamdarǵa da, osy maqsatqa jetýge jaǵdaı jasaıtyn Úkimetke de baılanysty.
Qazaqstannyń asqaq bolashaǵy úshin eldik saıasat, jasampaz patrıotızm, memlekettiń ıgiligi úshin kúndelikti eńbek pen ult birligi óte mańyzdy», - dedi ol.
