Jer sharynyń eń qart turǵyny ómirden ozdy
ASTANA. QazAqparat - Japonııanyń Hokkaıdo aralynyń turǵyny Masadzo Nonaka 20 qańtar kúni 113 jasynda ómirden ozdy. Ol álemdegi eń qart er adam edi, dep habarlaıdy «QazAqparat» HAA Kyodo agenttigine silteme jasap.
Ol tańerteń Asero eldi mekenindegi óz úıinde kóz jumdy. Masadzo Nonaka nemistiń dańqty fızık-teoretıgi Albert Eınshteın óziniń áıgili salystyrmaly teorııasyn jarııalaǵan 1905 jyldyń 25 shildesinde týǵan. Nonaka 2018 jyldyń 10 sáýirinde Gınnestiń rekordtar kitabyna Jer sharynyń eń qart er turǵyny retinde engen.
Oǵan deıin ǵalamshardyń eń qart turǵyny basqa bir japon Dzıroemon Kımýra edi. Ol 2013 jyldyń maýsymynda 116 jasynda qaıtys boldy.
