Jer sharynyń 6 qurlyǵynyń 100-den astam elin aralap, Antarktıda men Arktıkada bolǵan tanymal metsenat Sapar Ysqaqov «Jer sharyn aınala saıahat» atty kitabyn tanystyrdy
ASTANA. 9 jeltoqsan. QazAqparat - Búgin QR Sport jáne týrızm mınıstrliginde astanalyq kásipker, tanymal metsenat Sapar Ysqaqovtyń «Jer sharyn aınala saıahat» atty kitabynyń tanystyrylymy boldy.
10 taraýdan turatyn kitapta avtordyń kóp qyrly qoǵamdyq qyzmeti, álem elderin aralǵan kezdegi jazbalary jáne óziniń jańa jobalary jaıynda keńinen baıandalǵan.
Shamasy kelse taǵy da kitap jazatyndyǵyn basa aıtqan ol buǵan deıin «Dúnıe dıdaryna ińkár jıhangez» jáne «Dúnıedegi segizinshi ǵajaıyp, ne bolmasa dúnıe dıdary jıhangezdiń kózimen» atty kitaptarynyń jaryqqa shyqqanyn tilge tıek etti. «Osy úsh kitapty da qazaqshaǵa tolyq aýdaryp, ınternetke salý oıymda bar. Kitaptarymdy qazaq mektepterine, kitaphanalarǵa, JOO-larǵa taratamyn. Jalpy, áli de 2-3 kitap shyǵarý oıymda bar. Oǵan jınaǵan materıaldarym jetkilikti»», - dedi S.Ysqaqov.
Aıta keteıik, S.Ysqaqov 2007 jyly Ońtústik polıýsten shamamen 100 shaqyrym jerde ornalasqan «Amýndsen-Skott» amerıkandyq stansysynda bolyp, onda Qazaqstan men «Nur Otan» partııasynyń týlaryn ornatqan bolatyn. Al 2008 jyly Jerdiń eń Soltústik núktesinde Qazaqstan týyn jelbiretken edi. Sondaı-aq saǵatyna 2500 shaqyrym jyldamdyqpen zymyraıtyn MIG-29 áskerı ushaǵymen de kókke kóterilgen bolatyn. Ol jer sharynyń 6 qurlyǵynyń 100-den astam elin aralap, Antarktıda men Arktıkaǵa tabany tıgen alǵashqy qazaqtardyń biri.
