Jer sharyna 2040 jyly qaýip tónip tur
ASTANA. 1 naýryz. QazAqparat - NASA ǵalymdary Jer sharyna qaýip tóndiretin taǵy bir asteroıdty tapty, dep habarlaıdy Ýtro.rý.
2011 AG5 degen at qoıylǵan asteroıd, astronomdardyń aıtýynsha, 2040 jyly bizdiń ǵalamsharymyzǵa óte jaqyn keletin kórinedi. Onyń dıametri 140 m., al salmaǵy 3,9 mln. tonnaǵa jetedi.
Asteroıdty ǵalymdar 2011 jyldyń basynda kórgen eken, alaıda onyń Jerge qaýip tóndiretini endi ǵana belgili bolyp otyr. Ony álemniń júzdegen observatorııalary 43 kúnnen beri qalt jibermeı zertteýde. Asteroıd 23 aqpanda Jerge tym jaqyndap, 0,09562 astronomııalyq birlik qashyqtyqta (1 astoronomııalyq birlik 150 mln. shaqyrymdaı) ótken. Sondyqtan qazir bul aspan denesine Týrın shkalasy boıynsha qaqtyǵysý yqtımaldyǵy qaýpiniń birinshi bally berilgen.
Bul másele tipti Avstrııada ótken BUU-nyń Ǵylymı-tehnıkalyq komıtetiniń 49-sessııasynda talqylanyp ta úlgergen. Onda BUU-nyń bastamashyl toby óz baıandamasynda asteroıdtyń Jermen qaqtyǵysý yqtımaldyǵy az ekendigin aıtqan.
Degenmen, ǵalymdar aspan denesiniń traektorııasyn ózgertýdiń joldaryn izdestirýge bel sheshe kirisip ketken kórinedi. Usynylǵan nusqalardyń ishinde ıadrolyq qarý qoldaný týraly pikirler de bar. Al NASA-lyqtar 2011 AG5-ti «aýyrlatýdy» usynǵan, alaıda ony qalaı jasaıtyndaryn ózderi de durys bilmeıtin sııaqty.
