Jer sharynyń muz qoımasy taýsylyp barady: 50 jylda 9 trln tonna muz erip ketken

ASTANA. KAZINFORM – Muzdyqtardyń erýi saldarynan  1975 jyldan beri olardyń kóleminiń 9 trln tonnaǵa deıin azaıyp ketken, bul degenimiz Germanııanyń kólemindeı. 

Bul týraly BUU-nyń mamandandyrylǵan agenttigi Dúnıejúzilik meteorologııalyq uıymnyń ókili Kler Nýllıs málimdedi.

— Dúnıejúzilik muzdyqtardy baqylaý qyzmetiniń baǵalaýy boıynsha, 1975 jyly baqylaý bastalǵaly beri muzdyqtar jalpy kólemi 9 trıllıon tonnadan astam muzdy joǵaltty. Bul qalyńdyǵy 25 metr bolatyn Germanııa aýmaǵyndaı alyp muzdy blokqa teń, — dedi ol Jenevada ótken brıfıngte.

Onyń aıtýynsha, sońǵy jyldary álem «baqylaý tarıhyndaǵy muzdyqtardyń eń jyldam sheginýine» kýá boldy. BUU ókili muzdyqtar men muz jamylǵylary álemdik sý resýrstarynyń shamamen 70 paıyzyn saqtap turǵanyn eske saldy.

Aıta ketelik aldaǵy jyldary Arktıkadaǵy jylyný jahandyq ortasha kórsetkishten úsh ese artyq bolatyny týraly jazǵan edik.