Jer shary 8 mıllıard adamdy asyraýǵa qaýqarly ma
ASTANA. KAZINFORM — Aýstralııalyq ǵalymdardyń jańa zertteýi adamzattyń Jer resýrstaryn tutyný múmkindiginen asyp ketkenin kórsetti.
Sarapshylardyń pikirinshe, planetanyń turaqty damýy úshin adam sany 2,5 mıllıardtan aspaýy kerek edi.
Zertteýshiler sońǵy eki ǵasyrdaǵy demografııalyq derekterdi saralap, Jerdiń syıymdylyq shegine jetkenin málimdedi. Búginde álem halqy 8,3 mıllıardtan assa, ǵasyr sońyna qaraı bul kórsetkish 12 mıllıardqa jetýi múmkin. Alaıda ǵalymdardyń esebinshe, Jer shary esh qıyndyqsyz asyraı alatyn ońtaıly halyq sany — nebári 2,5 mıllıard.
— Biz qazir planetanyń tabıǵı múmkindigin aldap, qazba otynynyń arqasynda ómir súrip otyrmyz. Biraq Jer resýrstardy jańartyp úlgermeı jatyr. Qazirdiń ózinde álemde sýdyń tapshylyǵy bastaldy. Eger tutyný mádenıeti túbegeıli ózgermese, mıllıardtaǵan adam turaqsyz jaǵdaıǵa tap bolady, — dep eskertedi zertteý avtorlary.
Mamandardyń aıtýynsha, tehnologııanyń kómegimen halyq sanyn jasandy túrde ósirý klımattyń buzylýyna jáne ekojúıelerdiń kúıreýine ákeldi. Ǵalymdar planetany saqtap qalý úshin resýrstardy paıdalaný tásilderin shuǵyl qaıta qaraýdy usynady.
Aıta keteıik, buǵan deıin Jer shary jyldam aınala bastaǵanyn jazǵan edik.
