Jer resýrstarynyń biryńǵaı veb-portaly iske qosylady

ASTANA. QazAqparat - Bıyl Jer resýrstarynyń biryńǵaı veb-portaly iske qosylady. Bul jaıynda Májilis depýtattarynyń resmı saýalyna jaýap bergen QR Premer-mınıstri Asqar Mamın atap ótken, dep habarlaıdy QazAqparat tilshisi.

«Aǵymdaǵy jyly Aýyl sharýashylyǵy mınıstrligi aýyl sharýashylyǵy maqsatyndaǵy jerdiń bar ekendigi, olardyń tıimdi paıdalanylýy, jer ýchaskesin alýǵa elektrondy ótinim berý múmkinshiligimen bos jatqan jer ýchaskesi týraly barlyq málimetterdi kórsete otyryp, Jer resýrstary jónindegi biryńǵaı veb-portaldy iske qosýdy josparlap otyr», - dedi Asqar Mamın.

Jalpy, Úkimet basshysynyń dereginshe, aýyl sharýashylyǵymen aınalysatyn aýyl halqyn qoldaýdaǵy negizgi tetik Ónimdi eńbekpen qamtý baǵdarlamasy sanalady. 2018 jyly atalǵan baǵdarlama aıasynda 11 myń aýyl turǵyny 44,7 mlrd teńgege qarjylandyrylǵan.

«Aǵymdaǵy jyly baǵdarlama arqyly 50,2 mlrd teńge somaǵa 12 myń adamdy qamtý josparlanyp otyr. Bul rette barlyq qarajattyń shamamen 80 paıyzy mal sharýashylyǵyn damytýǵa baǵyttalady: aýyl sharýashylyǵy mal basy men jem-shóp satyp alý, aýyl sharýashylyǵy ónimderi boıynsha daıyndaý qyzmetin damytý jáne aýylda bıznestiń aýyl sharýashylyǵy emes túrlerin damytý», - dedi Premer-mınıstr.

Aıta keteıik, osy jyldyń 14 qańtarynda Májilistiń bir top depýtaty sol kezdegi Premer-mınıstr Baqytjan Saǵyntaevtyń atyna saýal joldap, aýyl sharýashylyǵyn damytý, aýyl turyndarynyń ál-aýqatyn jaqsartý máselesin kótergen edi.