Jer resýrstaryn basqarý jónindegi agenttik aýyl sharýashylyǵy jerlerin sheteldikterge paıdalanýǵa berýge baılasty bólimde Jer kodeksine ózgertý engizýdi usynýda
ASTANA. Qańtardyń 20-sy. QazAqparat /Rýslan Ǵabbasov/ - Jer resýrstaryn basqarý jónindegi agenttik Jer kodeksine ózgertýler engizý týraly usynysty ázirledi.
Onyń ishinde aýyl sharýashylyǵy maqsatynda jerdi sheteldikterge paıdalanýǵa berý turǵysyndaǵy máseleler qamtylǵan. Bul týraly búgin Astanada ótken alqa májilisinde atalǵan Agenttiktiń tóraǵasy Ómirzaq Ózbekov málim etti, dep habarlaıdy QazAqparat.
Atalǵan vedomstvo basshysynyń aıtýynsha, Agenttik jer zańnamasynyń normalaryna taldaý jasaǵan jáne osy jumystardyń nátıjesi boıynsha QR Jer kodeksine ózgertýler men tolyqtyrýlar engizý boıynsha usynys daıyndaǵan. Atap aıtqanda, memlekettik qajettilikter úshin jerdi alý tártibin tolyq reglamentteý boıynsha másele qaralǵan.
Sonymen birge usynystarǵa sáıkes memlekettik qajettilikter úshin jerdi alýdy retteý maqsatynda eldi mekenderdi, aıryqsha qorǵalatyn tabıǵı aýmaqtardy, energetıka, baılanys, kólik salasyn damytýǵa, sondaı-aq ken orynyn paıdalaný turǵysynda jerdi rezervteý tártibin bekitý qarastyrylýda.
«Atap aıtqanda, aýyl sharýashylyǵy maqsatyndaǵy jer telimderin sheteldikterge paıdalanýǵa berý bóligindegi jergilikti atqarýshy organdarynyń quzyryn ózgertý boıynsha, ıaǵnı, bundaı quzyr oblystyq atqarýshy organdarǵa beriledi. Aýdandyq atqarýshy organdardyń quzyreti bul turǵyda shektelgen. Olar jer ýchaskesin Jer resýrstaryn basqarý jónindegi agenttikpen kelisilgennen keıin ǵana bere alady», -dedi ol.
Ó. Ózbekovtyń sózine qaraǵanda, usynylǵan jańartýlarǵa sáıkes zańdy tulǵalarǵa, ıaǵnı olardyń jarǵylyq kapıtalynda sheteldikterdiń úlesi 50 paıyzdan astam bolsa, aýyl sharýashylyǵy maqsatyndaǵy jer ýchaskeleri tek arenda sharttary boıynsha 10 jylǵa deıingi merzimge ǵana beriledi.
