Jer resýrstaryn basqarý komıtetiniń óz zerthanasy joq - Aqylbek Kúrishbaev

NUR-SULTAN. QazAqaparat – Aýyl sharýashylyq jerleriniń qunaryn baqylaý úshin zerthanalyq bazany damytý kerek. Bul týraly QR Aýyl sharýashylyǵy mınıstrligi jer reformasy komıssııasynyń otyrysynda ekonomıkalyq jumys tobynyń jetekshisi Aqylbek Kúrishbaev aıtty, dep habarlaıdy QazAqparat tilshisi.

«Elimizde aýyl sharýashylyq jerleriniń qunaryn baqylaý úshin zerthanalyq bazany damytý kerek. Naqty aıtar bolsaq, «Azamattarǵa arnalǵan úkimet» memlekettik korporatsııasynyń topyraqtyq-geobotanıkalyq zerthanalar jelisin, sondaı-aq, QR AShM-nan «Agrohımııa qyzmeti respýblıkalyq ǵylymı-ádisteme ortalyǵy» mekemesin jer resýrstary salasyndaǵy ýákiletti organǵa (jer resýrstaryn basqarý komıtetine) berý kerek. Qazirgi ýaqytta komıtettiń ózine baǵynyshty eshqandaı zerthanasy joq. Sondyqtan eki mekemedegi zerthanalardy tikeleı jer resýrstary komıtetiniń nemese jańadan qurylatyn jer resýrstary agenttiginiń quzyryna berý týraly usynys aıtyp otyrmyz», - deıdi ekonomıkalyq jumys tobynyń basshysy Aqylbek Kúrishbaev.

Onyń aıtýynsha, bul usynysty ekonomıkalyq máseleler boıynsha jumys tobynyń otyrysyna qatysqan 30 adamnyń 25-i qoldap, 5-eýi qarsy bolǵan.

«Usynysty qoldaǵandardyń ishinde 2 adam ózderiniń erekshe pikirin aıtty. Olardyń oıynsha, eń aldymen topyraqtyq-geobotanıkalyq zerthanalar qyzmeti bastapqy kezde jer resýrstary salasyndaǵy ýákiletti organǵa berilýi tıis. Keıin jerdiń topyraq jáne botanıkalyq sapasyn tekserýge qajetti qyzmetterdi paıdalanýdyń algorıtmderi jasaqtalǵan soń bul zerthanalardyń qyzmet kórsetýin básekelestik ortaǵa berý kerek», - deıdi ol.