Jer resýrstaryn basqarý agenttigin qurý kerek - Baqytjan Bazarbek

ASTANA. QazAqparat – Májilis depýtaty Baqytjan Bazarbek jer salasyndaǵy sybaılas jemqorlyqpen kúrestiń jańa tásilderin engizýdi usyndy, dep habarlaıdy QazAqparat tilshisi.

«Jer reformasyn bastaý kerek jáne jer reformasynyń negizgi baǵyty retinde jer salasyndaǵy olıgopolııadan shynaıy arylý kerek. Jer salasyndaǵy monopolııalardyń qalyptasýyna quqyqtyq jolmen toıtarys berýimiz qajet. Aýyl sharýashylyǵy jerlerine zańsyz ıe bolǵandar ony ıgermeı, dereý satýǵa, ne bankke kepilge qoıýǵa tyrysatyn. Eki ortada sybaılas jemqorlyqtan qarapaıym halyq jáne memlekettiń múddesi zardap shegedi. Sondyqtan, aldaǵy ýaqytta jer salasynda halyq úshin túbegeıli reforma qajet. Reformanyń negizgi maqsaty halyqtyń jer qatynastarynda quqyqtaryn kúsheıtý jáne memlekettik qorǵaý bolý kerek», - dedi B. Bazarbek Májilistiń jalpy otyrysynda Premer-Mınıstrdiń orynbasary - Saýda jáne ıntegratsııa mınıstri Serik Jumanǵarınniń atyna joldaǵan saýalynda.

Onyń paıymynsha, jer kadastrynyń jáne aýyl sharýashylyǵy maqsatyndaǵy jer ıeleri aty-jónderiniń ashyqtyǵyn qamtamasyz etý qajet. Myńdaǵan gektar jerdiń ıelerin jarııalaý kerek.

«Ekinshiden, jerge baqylaý jasaıtyn memlekettik organ ákimge de, aýyl sharýashylyǵy mınıstrligine de baǵynbaıtyn, Úkimet quramyna kiretin derbes organ – jer resýrstaryn basqarý agenttigin qurý myńyzdy. Úshinshiden, memlekettik jer kadastryn bir qolǵa, ıaǵnı tsıfrlyq damý mınıstrliginen jer resýrstaryn basqarý agenttigine berý qajet», - dedi depýtat.