Jer resýrstaryn basqarý agenttigi jaıylym men shabyndyqty utymdy paıdalanbaǵan, zańǵa qaıshy berilgen jerlerdi memleket menshigine alýdy kózdep otyr

Búgin QR Parlamenti Májilisinde ótken Úkimet saǵatynda Jer resýrstaryn basqarý agenttiginiń tóraǵasy Ómirzaq Ózbekov osylaı málim etti.

Agenttik tóraǵasynyń aıtýynsha, mal sharýashylyǵyn damytýdyń birden-bir kózi búgingi kúnge deıin paıdalanylmaı kelgen jaıylym men shabyndyq jerlerdi ıgerýge tikeleı baılanysty bolyp tabylady. Sonymen qatar, maýsymdyq jáne shól-shóleıt aýmaqtarda ornalasqan jerlerdi aýyl sharýashylyǵy aınalymyna ıgerý de ózekti másele bolyp otyr.

«Bul rette atap kórsetetin jaıt, burynǵy ujymshar, keńshar bolyp uıymdasqan kezeńde mal sharýashylyǵyn órkendetý úshin tabıǵı jaıylymdar tolyq ári jiti paıdalanyp kelgeni málim. Onyń ishinde ásirese maýsymdyq jaıylymdardy kóktemgi tóldetý, jazǵy jaılaý men qystaýlardy paıdalaný kezeńi sáıkestelip rettelip otyrdy. Al qazirgi kezeńdegi qalyptasqan jaǵdaıǵa kelsek, keıbir eldi mekender mańyndaǵy jergilikti turǵyndardyń mal jaıýy men shóp shabýy úshin, sondaı-aq shalǵaıdaǵy mal sharýashylyǵynyń maýsymdyq jaıylymdaryna arnalǵan jerlerdi óteýli uzaq merzimge paıdalanýǵa nemese jeke menshikke berýge rásimdelgen jaǵdaılar kezdesedi. Alaıda, Jer kodeksiniń 36-babyna sáıkes, mundaı jerler tek 5 jylǵy merzimge ǵana paıdalaný quqyǵyna ıe bolatyn. Bundaı jaǵdaılar jaıylym jáne shabyndyq jerlerdi tıimdi paıdalanýǵa keri áserin tıgizip otyr. Óıtkeni, sharýashylyqtaǵy mal sanyna tıesili jerler rettelmeı, basqa sharýashylyqtardyń paıdalanýyna shekteýler qoıylyp, keıbir tulǵalardyń qolyna edáýir jaıylym jerleriniń shoǵyrlanýy jol berilip keldi. Sondyqtan agenttik jerdi paıdalaný men qoldanýdy memlekettik baqylaýdy iske asyrý barysynda jaıylym jáne shabyndyq jerlerdi utymdy, tıisti maqsatynda paıdalanbaǵan, zańǵa qaıshy berilgen jerlerdi memleket menshigine alýdy basty nazarǵa alyp otyr», - dedi Ó. Ózbekov.