Jer resýrstaryn basqarýdyń salalyq aqparattyq júıesi ázirlenip jatyr

ASTANA. KAZINFORM — Jer resýrstaryn basqarýdyń salalyq aqparattyq júıesi ázirlenip jatyr. Bul týraly Senat depýtattarynyń saýalyna Premer-mınıstr Oljas Bektenovtiń jaýabynda aıtylǵan. 

— Jaıylymdyq jáne ózge de jer derekteriniń biryńǵaı tsıfrlyq bazasyn qalyptastyrýǵa qatysty derekter qoryn qalyptastyrý jáne topyraq, agrohımııalyq jáne geobotanıkalyq zertteýler júrgizý fýnktsııalaryn «Jerdi zertteý jónindegi jumystardy júrgizý memlekettik ınstıtýty» ShJQ RMK júzege asyrady. Kásiporyn jerdiń sapalyq jaı-kúıin esepke alýdy, onyń ishinde olardy ekonomıkalyq baǵalaýdy jáne monıtorıngteýdi, topyraq, geobotanıkalyq jáne agrohımııalyq zertteýler júrgizýdi jáne topyraqty bonıtırovkalaýdy júzege asyrady. Biryńǵaı aqparattyq keńistikti qalyptastyrý, keńistiktik derekterdi jınaýdy, saqtaýdy, óńdeýdi jáne vızýalızatsııalaýdy qamtamasyz etý maqsatynda RMK aqparattyq geoportal qurdy, — dep atap ótedi Úkimet basshysy.

Onyń aıtýynsha, geoportal ınternet jelisinde ornalastyrylǵan jáne barlyq sanattaǵy paıdalanýshy úshin onlaın-rejımde ashyq qoljetimdilikti qamtamasyz etedi. Onda aýyl sharýashylyǵy alqaptary, onyń ishinde egistikter, jaıylymdar, shabyndyqtar, kópjyldyq ekpeler jáne tyńaıǵan jerler týraly derekter olardyń túrleri boıynsha egjeı-tegjeıli berilgen.

— Qazirgi ýaqytta arhıvtik derekterdi tsıfrlandyrý jáne júıeleý arqyly geoportaldy topyraq jáne geobotanıkalyq zertteý materıaldarymen toltyrý jumystary júrgizilip jatyr. Jer resýrstarynyń jaı-kúıine taldaý jasaýǵa múmkindik beretin topyraqtyń agrohımııalyq kórsetkishteri bar mamandandyrylǵan bólim qarastyrylǵan. Qosymsha kadastrlyq derekterdi, ınjenerlik ınfraqurylym, jer qoınaýyn paıdalaný ýchaskeleri jáne aýyl sharýashylyǵy maqsatyndaǵy jerler týraly málimetterdi ıntegratsııalaı otyryp, biryńǵaı tsıfrlyq ortany qalyptastyrýdy kózdeıtin Jer resýrstaryn basqarýdyń salalyq aqparattyq júıesin qurý boıynsha daıyndyq júrgizilip jatyr, — dedi Oljas Bektenov.

Buǵan deıin jaıylymdyq ınfraqurylymdy damytý jeke baǵdarlamasy ázirlenbeıtinin jazǵan edik.