Jer paılary ıeleriniń «biryńǵaı tizilimi» quryla ma – Smaıylovtyń jaýaby

Premr-Mınıstr Álıhan Smaıylov Senat depýtattarynyń jer paılary ıeleriniń «biryńǵaı tizilimin» qurýǵa qatysty saýalyna jaýap berdi, dep habarlaıdy Kazinform.

«Jaýapkershiligi shekteýli jáne qosymsha seriktestikter týraly» Zańnyń 23-babyna sáıkes jaýapkershiligi shekteýli seriktestiktiń jarǵylyq kapıtaly quryltaıshylardyń (qatysýshylardyń) salymdaryn biriktirý jolymen qurylady. Seriktestiktiń jarǵylyq kapıtalynyń mólsheri seriktestiktiń quryltaı sharttarynda kórsetiledi jáne kommertsııalyq qupııa bolyp tabylady . Aıtylǵandardy eskere otyryp, qoldanystaǵy zańnamaǵa sáıkes jer paılary ıeleriniń «biryńǵaı tizilimin» qurý múmkin emes», – dedi Úkimet basshysy jaýabynda.

Á.Smaıylovtyń atap ótýinshe, Jer kodeksiniń ótpeli erejelerin iske asyrý aıasynda shartty jer úlesteriniń (ShJÚ) burynǵy ıeleri 2005 jyldan bastap ShJÚ-ge quqyǵyn iske asyrý tásiline qaraı jer ýchaskeleriniń menshik ıeleri (jer paıdalanýshylary) nemese sharýashylyq sýbektileriniń qatysýshylary mártebesine ıe boldy. Nátıjesinde, 2005 jyly jer úlesteri ınstıtýty óziniń qoldanysyn toqtatty jáne «Qazaqstan Respýblıkasynyń keıbir zańnamalyq aktilerine jer qatynastaryn retteý máseleleri boıynsha ózgerister men tolyqtyrýlar engizý týraly» 2011 jylǵy 20 shildedegi Zańmen Jer kodeksiniń ótpeli jaǵdaıy alynyp tastaldy.

«Búgingi tańda ShJÚ menshik ıeleri jer ýchaskesine quqyqtardy sharýa qojalyǵyn derbes (birlesip) júrgizý jolymen ne sharýashylyq seriktestikteriniń jarǵylyq kapıtalyna salym retinde nemese óndiristik kooperatıvterge jarna retinde iske asyrady. Osyǵan baılanysty qoldanystaǵy zańnamaǵa ózgerister engizý talap etilmeıdi», – dedi Premer-Mınıstr.