Jer, orman, ekologııalyq jáne kásipkerlik kodeksterge túzetý engizildi
ASTANA. KAZINFORM – Memleket basshysy «Qazaqstan Respýblıkasynyń keıbir zańnamalyq aktilerine akvasharýashylyq, agroónerkásiptik keshen, elektr energetıkasy jáne jekelegen ortalyq memlekettik organdardyń fýnktsııalaryn qaıta bólý máseleleri boıynsha ózgerister men tolyqtyrýlar engizý týraly» zańǵa qol qoıdy. Bul týraly Aqordanyń baspasóz qyzmeti habarlady.
Zańmen Jer, Orman, Ekologııalyq jáne Kásipkerlik kodeksterge, sondaı-aq 14 zańǵa túzetý engizildi.
Túzetýlerdiń birinshi blogy zańnamalyq aktilerdi qabyldanǵan jáne qol qoıýǵa usynylǵan «Akvasharýashylyq týraly» zańǵa sáıkes keltirýge baǵyttalǵan.
Jer kodeksine engizilgen túzetýlermen akvasharýashylyqty júrgizý úshin sý qory jerleriniń quramynan jer ýchaskelerin berý múmkindigi belgilendi.
Bul rette akvasharýashylyqty júrgizýge arnalǵan jer ýchaskelerin berý úshin konkýrstyq ótinimge qoıylatyn talaptar reglamenttelgen.
Orman kodeksine engizilgen túzetýlermen memlekettik orman qory ýchaskelerinde balyq ósirý jónindegi qyzmetti júzege asyrý múmkindigi belgilendi.
Janýarlar dúnıesin paıdalanýǵa arnalǵan lımıtter men kvotalardy belgileýge qoıylatyn talaptar qaıta qaraldy.
«Agroónerkásiptik keshendi jáne aýyldyq aýmaqtardy damytýdy memlekettik retteý týraly» zań agroónerkásiptik keshen sýbektilerin memlekettik qoldaý sharalarynyń jańa nysandarymen tolyqtyryldy.
Túzetýlerdiń ekinshi blogy «Qazaqstan Respýblıkasynyń memlekettik basqarý júıesin odan ári jetildirý jónindegi sharalar týraly» Qazaqstan Respýblıkasy Prezıdentiniń 2024 jyldyń 3 qańtaryndaǵy № 429 Jarlyǵyn iske asyrýǵa baǵyttalǵan, soǵan sáıkes Ekologııa jáne tabıǵı resýrstar mınıstrliginiń balyq sharýashylyǵy salasyndaǵy fýnktsııalary men ókilettikteri Aýyl sharýashylyǵy mınıstrligine berilgen. Osyǵan baılanysty atalǵan memlekettik organdar arasynda fýnktsııalar zańmen qaıta bólindi.
Túzetýlerdiń úshinshi blogymen jer qatynastary salasyndaǵy jekelegen máseleler retteldi
Jer kodeksine engizilgen túzetýlerge sáıkes, jer ýchaskesinde júzege asyrý maqsatynda berilgen jer qoınaýyn paıdalaný quqyǵyn toqtatý jer paıdalaný quqyǵyn toqtatý úshin de negiz bolady.
Aýyl sharýashylyǵy óndirisine agrohımııalyq zertteý júrgizý jónindegi qyzmet arnaıy qurylǵan sharýashylyq júrgizý quqyǵyndaǵy respýblıkalyq memlekettik kásiporynǵa júktelgen.
Túzetýlerdiń tórtinshi blogynda «Astyq týraly» zańǵa astyq jemdik qoryn qalyptastyrý jáne qamtamasyz etý isine baǵyttalǵan ózgerister engizildi.
Astyqtyń rezervtik qoryn aıyrbastaýdy jáne jemdik qoryn aıyrbastaýdy júzege asyrý jónindegi fýnktsııalardy qosa alǵanda, jemdik qordy basqarýdy astyq naryǵy jónindegi operator júzege asyratyn bolady.
Jemdik qordy basqarý jónindegi erejeni Aýyl sharýashylyǵy mınıstrligi bekitedi.
Túzetýlerdiń besinshi blogy «Elektr energetıkasy týraly» zańda qosylǵan quny joǵary ónim óndirýshilerdi qoldaý maqsatynda elektr energııasyna ınvestıtsııalyq tarıfti qoldaný tetigin engizdi.
«Tabıǵı monopolııalar týraly» zańǵa engizilgen túzetýlermen sý salasy qyzmetkerleriniń ortasha aılyq nomınaldy jalaqysynyń deńgeıi elektr jáne jylý energetıkasy salasyndaǵy jalaqy deńgeıine teńestirildi.
Zań mátini baspasózde jarııalanady.
Aıta ketelik Prezıdent «Akvasharýashylyq týraly» zańǵa qol qoıǵan edi.