Jer orbıtasyndaǵy otelde jumys isteý úshin ǵaryshkerler izdestirilýde - AQSh
ASTANA. Naýryzdyń 16-sy. QazAqparat - Amerıkandyq "Bıgeloý aerospeıs" fırmasy Jer orbıtasyndaǵy otelde jumys isteý úshin ǵaryshkerler izdestirýde,
dep habarlaıdy «Maıak» radıosy.
Qoıylyp otyrǵan talaptar boıynsha, úmitkerler ǵarysh sapary boıynsha daıyndyq kýrsynan ótýi, sondaı-aq az bolsa da ushý tájirıbesi bolýy kerek.
Orbıtada olar atqaratyn mindetterdiń qatarynda - stansy qaýipsizdigin qamtamasyz etý jáne klıentterge kómektesý mindetteri bar. Ashyq ǵaryshqa shyǵý múmkindigi de joq emes. Biraq ázirge olardyń jalaqylary jarııa etilmeı otyr. Kompanııa orbıtaldyq keshendi 2015 jyly iske qospaq.
Týrıster orbıtadaǵy oteldiń ıllıýmınatorlarynan Jerdi tamashalaı alady. Juldyzdy oteldegi bir kún túneý bastapqy kezde 1 mıllıon dollarǵa túsetin bolady.
