Jer qoınaýynyń baılyǵy halyq ıgiligine qyzmet etýi kerek – Berdibek Saparbaev
TARAZ. QazAqparat - Oblys ákimi Berdibek Saparbaevtyń tóraǵalyǵymen ótken keńeste jer qoınaýyn paıdalanýshylardyń kelisimsharttyq mindettemelerdi oryndaý jaıy qaraldy, dep habarlaıdy Qazaqparat tilshisi.
Aǵymdaǵy jyldyń 1 naýryzyndaǵy jaǵdaıǵa sáıkes, oblysta 319 jer qoınaýyn paıdalaný nysany tirkelgen. Onyń ishinde barlaý jáne óndirýge arnalyp 200 kelisimshart jasalǵan desek, 109 lıtsenzııa jáne jol qurylysyn salýǵa arnalǵan 9 jeńildetilgen ruqsat berilgen.
Іri jer qoınaýyn paıdalanýshylar qatarynda «EýroHım Ýdobrenııa», «Monterro Qazaqstan», «Qazaqsoda», «Jambylgıps» jáne taǵy da basqa kompanııalar bar.
Oblystyq tabıǵı resýrstar jáne tabıǵat paıdalanýdy retteý basqarmasynyń basshysy Aslan Orazbekov ótken jyl boıynsha ázirge naqty qorytyndy aqparat joq ekenin, sondyqtan 2019 jylǵy málimetterdi negizge alýyna týra keletinin tilge tıek etti. Onyń aıtýynsha, 2019 jyly ınvestıtsııalardyń jalpy kólemi 63,2 mıllıard teńgeni, al salyq túsimderi 9,8 mıllıard teńgeni qurap, mamandardy oqytý jáne qaıta daıarlaýǵa 207 mıllıon teńge baǵyttalǵan.
Atalǵan basqarmamen anyqtalǵan buzýshylyqtardy joıý týraly tıisti orynǵa 59 habarlama joldanǵan desek, 11 shart buzylyp, onyń 10-ynda kenishterdi qalpyna keltirý jumystary oryndalǵan. Oblys aýmaǵynda taǵy 17 kásiporyn tirkelip, jergilikti bıýdjetke salyq tólemderin aýdara bastady.
«Óńirdiń ekonomıkasy men onyń turǵyndarynyń ál-aýqaty jer qoınaýyn sapaly paıdalanýǵa da baılanysty. Negizgi másele – jer qoınaýyn paıdalanýshylardyń kelisimsharttyq mindettemelerin oryndaýy. Buǵan kompanııalardyń qyzmet etetin orny boıynsha tirkelýi, ınvestıtsııalar salý, jergilikti kadrlardy daıarlaý jáne áleýmettik tólemder jatady. Búginde atalǵan sharttardyń oryndalýyna qatysty baqylaý álsiz júrgizilýde», - dep atap ótti Berdibek Saparbaev.
Ekologııa departamentiniń basshysy Marat Qurmanbaev mysal retinde Jambyl aýdanynyń jer qoınaýyn paıdalanýshylardyń belgilengen kelisimsharttyq aımaqtyń shekarasyn buzý jáne aýyl sharýashylyǵy jerlerinde óz betinshe paıdaly qazbalardy óndirýge qatysty túrli faktilerdi alǵa tartty.
Budan soń oblys ákimi beınebaılanys arqyly keıbir iri kásiporyndardyń jaı-kúıine nazar aýdardy. Aıtalyq, «Monterra Qazaqstan» altyn óndirýshi kompanııasy ınvestıtsııalar kólemin 832 mıllıard teńgege deıin ulǵaıtpaq, ol jaqyn arada jer barlaý jumystaryn bastaýǵa nıetti. Berdibek Saparbaev taý-ken baıytý kombınatynyń qurylysyn jedeldetip, altyn kenderin ıgere bastaýǵa shaqyrdy. Jergilikti bıliktiń kómegimen «Qazsoda» JShS qajettiligi úshin jer bólý máselesi de óz sheshimin tapty.
«Bizdiń jerimizdiń qoınaýy halyqtyń ıgiligine qyzmet etýi tıis. Sizder bıznestiń áleýmettik baǵytyn umytpaý kereksizder. Barlyq kelisimsharttyq mindettemeler saqtalýy qajet. Ákimder men tıisti qurylymdar tarapynan qatań baqylaý ornatý kerek. Geologııalyq barlaý jumystarynyń aýqymyn keńeıtý qajettiligi týyndaýda. Quqyq qorǵaý organdaryna jer qoınaýyn zańsyz paıdalanýǵa baqylaýdy kúsheıtý boıynsha tapsyrma berildi. Ásirese, Moıynqum aýdanynda óz betterinshe tehnıkalarmen jumys isteıtinder az emes, al aýdan ákimi olardan múlde habarsyz. Búgingideı pandemııa men ekonomıkalyq qıyndyqtar kezeńinde jumysshylar jalaqyny ýaqytyly jáne tolyq kólemde alýy tıis. Jalaqynyń jyl saıynǵy ósimi kem degende 10-15 paıyzdy qurap otyrýy kerek», - dep túıindedi Berdibek Saparbaev.
