Jer qoınaýyn tıimdi paıdalanbaǵan kásiporyndardyń zalal kólemi jańa ádispen esepteledi

ASTANA. QazAqparat – Jer qoınaýyn utymdy paıdalanbaý saldarynan bolǵan zalal mólsherin aıqyndaý tártibi ózgerýi múmkin. Bul týraly «Ashyq» NQA portalynda jarııalanǵan Energetıka mınıstriniń buıyryǵynda jazylǵan, dep habarlaıdy QazAqparat tilshisi.

«Kómirsýtekterdi barlaý men óndirý, ýran óndirý kezinde jer qoınaýyn utymdy jáne keshendi paıdalaný jónindegi talaptardy buzý saldarynan keltirilgen zalaldyń mólsheri kómirsýtekterdiń nemese ýrannyń normalanǵan ysyraptarynan asatyn naqty ysyrabynyń kólemin negizge ala otyryp aıqyndalady. Buǵan qosa, resmı normaǵa sáıkes, esepti kezeńdegi baǵa belgileýdiń ortasha qunyna súıene otyryp qundyq mánde aıqyndalady», - delingen qujatta.

Buǵan deıin zalal mólsheri esepti kezeńdegi ónimdi ótkizýdiń ortasha baǵasy boıynsha bekitiletin edi.

«Mysaly, jer qoınaýyn paıdalanýshy esepti kezeńde 2 658 000 tonna munaı óndirdi. Osy kezeńde munaıdyń naqty ysyraby 4 442 tonna boldy. Onyń ishinde bekitilgen normatıvtik ysyrap – 1 081 tonna. Esepti kezeńde jer qoınaýyn paıdalanýshynyń munaıdy satý kezindegi ortasha baǵa 50,49 dollar boldy. Onda kórsetilgen formýla arqyly (4442 - 1081) h 50,49 = 16 9696,89 dollarǵa teń bolady», - dep mysal keltirilgen qujatqa qosymsha berilgen túsindirmede.

Buıryq jobasy 7 sáýirge deıin kópshilik talqylaýda bolady.