Jer qoınaýyn paıdalanýshylarmen jasalǵan 52 kelisimshart kúshin joıdy

NUR-SULTAN. QazAqparat – Jer qoınaýyn paıdalanýǵa berilgen búkil kelisimshart pen lıtsenzııalarǵa taldaý jasaldy. Onyń nátıjesi týraly QR Indýstrııa jáne ınfraqurylymdyq damý mınıstri Qaıyrbek Óskenbaev aıtyp berdi, dep habarlaıdy QazAqparat tilshisi.

«Búgingi tańda qatty paıdaly qazbalar boıynsha jer qoınaýyn paıdalaný salasynda 499 kelisimshart jáne 1 738 lıtsenzııa iske asyrylýda. Prezıdent tapsyrmasyna sáıkes qazir búkil ken ornyn tekserip jatyrmyz. Jer qoınaýyn paıdalanýǵa buryn-sońdy berilgen qoldanystaǵy barlyq kelisimshart pen lıtsenzııalarǵa taldaý jasaldy. Bul - 2 myńnan astam qujat», - dedi Qaıyrbek Óskenbaev Úkimet úıinde ótken baspasóz máslıhatynda.

Onyń aıtýynsha, mınıstrlik qatty paıdaly qazbalar boıynsha 202 kelisimshartty qaraǵan.

Nátıjesinde 52 kelisimshart zańdy kúshin joıyp, buzýshylyqtardy joıý týraly 43 habarlama jiberildi.

«Osylaısha, 118 lıtsenzııa toqtatyldy. Taldaý qorytyndysy negizinde qoldanystaǵy 1620 lıtsenzııa boıynsha tıisti sharalar qabyldanady. Mindettemeni oryndaý kórsetkishi 100 paıyzdan tómen jer qoınaýyn paıdalanýshylar tekseriledi», - dedi Q. Óskenbaev.

Buǵan deıin Indýstrııa mınıstri pandemııaǵa qaramastan 2021 jyly 1700-den astam lıtsenzııa berilgenin jáne 800-ge jýyq otandyq ıýnıorlyq kompanııa qurylǵanyn aıtqan edi.