Jer qoınaýyn paıdalanýshylardyń otandyq mashına jasaýshylardyń taýarlaryn satyp alýy qysqaryp barady

ASTANA. QazAqparat – Jer qoınaýyn paıdalanýshylardyń otandyq mashına jasaýshylardyń taýarlaryn satyp alýy qysqaryp barady. Bul týraly búgin Úkimet otyrysynda Indýstrııa jáne ınfraqurylymdyq damý mınıstri Marat Qarabaev aıtty, dep habarlaıdy QazAqparat tilshisi.

«Munaı-gaz jáne taý-ken metallýrgııalyq mashına jasaý sektorlarynda sorǵylar men kompressorlardy, klapandardy, bekitý armatýrasyn, gıdravlıkalyq jáne pnevmatıkalyq jabdyqtardy shyǵarý boıynsha tıisti qýattar bar. Alaıda jer qoınaýyn paıdalanýshylardan tapsyrystardyń bolmaýy kásiporyndardyń áleýetin tejeıdi. Mysaly, olardyń satyp alýlarynda mashına jasaý taýarlary 54 paıyzdy quraıdy. 2019 jyldan 2022 jylǵa deıin mashına jasaý taýarlaryn satyp alý kólemi jalpy osy zaýyttarda 8 paıyzǵa ulǵaıǵan. Alaıda jergilikti qamtý úlesi 12,6 paıyzdan 9,9 paıyzǵa deıin tómendegen», - dedi Marat Qarabaev.

Onyń atap ótýinshe, jaǵdaıdy túzetý maqsatynda osy sektordy damytýdyń negizgi baǵyty qarsy mindettemelerdi oryndaý sharttaryn iske asyra otyryp, uzaq merzimdi ofteık-kelisimsharttar jasaýǵa negizdeletin bolady.

Osyǵan deıin mashına jasaýdy damytýdyń 5 jyldyq keshendi jospary ázirlenip jatqany habarlandy.