Jer qoınaýyn paıdalanýshylar qazaqstandyq qamtýǵa úlken mán berip, onyń kólemin ulǵaıtyp otyrýy tıis - jaýapty hatshy

ALMATY. Qarashanyń 20-sy. QazAqparat /Erbol Azanbek/ - Qazaqstandyq qamtýdy damytý úshin elimizdegi 7 birdeı zańǵa ózgeris engiziledi. Qazir zań jobalary Májilis qaraýynda jatyr. Bul týraly búgin Almatyda «Jer qoınaýyn paıdalanýshylardyń kelisimdik mindettemelerin oryndaýy. 9 aıdyń qorytyndysy» atty kóshpeli keńes barysynda QR Energetıka jáne mıneraldyq resýrstar mınıstrliginiń jaýapty hatshysy Qanatbek Safınov aıtty,

 dep habarlaıdy QazAqparat.

Onyń aıtýynsha, jer qoınaýyn paıdalaný salasy boıynsha da qazaqstandyq qamtýdy ulǵaıtý maqsatynda birqatar qadamdar jasalǵan. Eń bastysy «Jer qoınaýy baılyqtary jáne jer qoınaýyn paıdalaný» týraly jańa zań jobasy Májilis qaraýynda jatyr.

«Zań jobasynda qazaqstandyq qamtýdy ulǵaıtýdy qamtamasyz etý úshin túbegeıli ózgerister jasalǵan. Bundaǵy zań normalary qazaqstandyq qamtý boıynsha kelisim sharttardyń oryndalýyn kúsheıtedi. Zań jobasy boıynsha kelisimsharttardyń oryndalýyna jaýapkershilikpen qaramaǵan kompanııalarǵa ákimshilik sharalardan bastap aıyppul tóletý, tipti kelisimsharttardy buzýǵa deıin qarastyrylǵan. Bul zań jobasymen qatar Elbasy jarlyǵy boıynsha mınıstrlik QR Kelisimshart agenttigimen birlesip jer qoınaýyn paıdalanýshylar tutynatyn taýarlarǵa monıtorıng júrgizilip otyrady», deıdi Q.Safınov.

Ol sondaı-aq bul máseleniń  Elbasynyń, Úkimettiń basty nazarynda ekendigin atap ótip, kez-kelgen jer qoınaýyn paıdalanýshy zań men  mindettemelerge deıin-aq qazaqstandyq qamtýǵa úlken mán berip, onyń kólemin ulǵaıtyp otyrýy tıistigin aıtty. Onyń aıtýynsha, ótken jyly  jer qoınaýyn paıdalanýshylar 22 mıllıard dollarǵa taýar satyp alǵan. «Endigi maqsat osy satyp alý kóleminiń basym bóligin qazaqstandyq qamtýǵa jumsaý. Búgingi otyrys ta, qabyldanýy tıis zań jobasy da, basqa da is-sharalar osy baǵytty kúsheıtý maqsatynda jasalýda», deıdi QR Energetıka jáne mıneraldyq resýrstar mınıstrliginiń jaýapty hatshysy.

Sońǵy ýaqytta Úkimet basshysynyń bastaýymen qazaqstandyq qamtý máselesi boıynsha elimizdiń birneshe óńirinde kóshpeli májilis ótkizilgeni málim. Olardyń  qorytyndysy boıynsha trıllıon teńge kóleminde 1 myńnan astam memorandým, 680 mıllıard teńgelik 8,5 myń kelisimshart jasalǵan bolatyn.