Jer qoınaýyn paıdalaný jumystaryn júrgizýge baqylaýdy kúsheıtý qajet -N. Qapparov
ASTANA. 11 maýsym. QazAqparat - Jer qoınaýyn paıdalaný jumystaryn júrgizýge baqylaýdy kúsheıtý qajet.
Búgin Májiliste ótken Úkimet saǵatynda Qorshaǵan ortany qorǵaý mınıstri Nurlan Qapparov osylaı málim etti.
«Sońǵy ýaqyttarda eldi mekenderdi sýmen qamtamasyz etýdegi negizgi kóz bolyp tabylatyn jer asty sýlarynyń sapasy nasharlap barady. Osyǵan oraı, jalpy alǵanda tabıǵı resýrstardy utymdy paıdalaný jáne qorshaǵan ortaǵa uqypty qaraý máselelerine qatysty zańdardyń oryndalýyn qamtamasyz etý úshin jer qoınaýyn paıdalaný jumystaryn júrgizýge baqylaýdy kúsheıtý qajet dep oılaımyn. Onyń ishinde jerasty sýlardyń jaǵdaıyna júıeli rejimdik baqylaý júrgizý mańyzdy», - deıdi mınıstr Nurlan Qapparov.
Onyń paıymynsha, tabıǵı resýrstardy utymdy paıdalanýdyń jáne ekojúıelerdi saqtaýdyń jańa baǵyty - ekologııalyq qonystandyrýdy damytý asa mańyzdy. Al bul rette mınıstrdiń aıtýynsha, ekologııalyq qonystandyrý - bul jasyl tehnologııaly úı qurylysyn, avtonomdyq energııamen jáne sýmen qamtamasyz etýdi, sondaı-aq qaldyqtardy kádege jaratýdy paıdalana otyryp, ekologııalyq ómir saltyna umtylatyn turǵyndardyń ekologııalyq standarttar boıynsha salynǵan aýylyn nemese shaǵyn qalalardy bildiredi.
«Búgingi kúni baılyq-dáýletteri ártúrli memleketterde salynǵan myńdaǵan ekoqonystar ómir súrý sapasyn arttyrýǵa, jumyspen qamtý, ýrbanızatsııa jáne qorshaǵan orta problemalaryn sheshýge oń yqpal etip keledi. Osy baǵytty qoldaý úshin halyqaralyq tájirıbelerdi eskere otyryp, memlekettik jáne jergilikti deńgeılerde arnaıy baǵdarlamalar qajet etiledi», - deıdi mınıstr.
