Jer qoınaýyn paıdalaný týraly zań qabyldandy - Parlament
ASTANA. Maýsymnyń 10-y. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Jer qoınaýy jáne jer qoınaýyn paıdalaný týraly» zań jobasy boıynsha qos palata arasyndaǵy kelispeýshilikterdi eńserý jónindegi kelisim komıssııasynyń usynystaryn talqylap, qujatty qabyldady.
Endi Parlament qabyldaǵan zań Memleket basshysynyń qol qoıýyna jiberiledi.
Esterińizge sala keteıik, atalǵan zań jobasy jer qoınaýyn paıdalaný operatsııalaryn júrgizýge ınvestıtsııa tartý úshin jaǵymdy jaǵdaı jasaýǵa, respýblıkalyq jáne óńirlik múddeler men mıneraldyq-shıkizattyq bazanyń úılesimin qamtamasyz etýge baǵyttalǵan. Qujatta memlekettiń basym quqyqtaryn júzege asyrý men jer qoınaýyn paıdalaný quqyǵy bar zańdy tulǵalardy jer qoınaýyn (onyń bólikterin) paıdalaný quqyqtarynan aıyrýǵa ruqsat berý (ruqsat bermeý) rásimderin egjeı-tegjeıli retteý sharalary qarastyrylyp otyr. Sonymen birge, zań jobasy boıynsha jer qoınaýyn paıdalaný quqyǵyn konkýrstyq jaǵdaıda jáne tikeleı kelissózder arqyly berý kózdeledi. Sondaı-aq quziretti organdar bastamasy boıynsha birjaqty túrde jer qoınaýyn paıdalaný sharttarynyń kúshi toqtatylǵan jaǵdaıda ony qaıta jańǵyrtýdy qarastyratyn ereje de engizildi.
Talqylaý barysynda senatorlar Májilis maquldaǵan qujatqa birqatar baǵyttar boıynsha ózgerister engizgen bolatyn. Máselen, strategııalyq mańyzdy ilespe gazdy óńdeý arqyly tıimdi paıdalaný nemese qorshaǵan ortany jáne halyq densaýlyǵyn qorǵaý úshin munaı hımııasy ónerkásibine shıkizat resýrstaryn alýdy qarastyratyn túzetýler kózdelgen. Toqtala ketetin jaıt, Memleket basshysynyń 2010 jylǵy naýryzdyń 12-sindegi «Qazaqstan Respýblıkasyndaǵy memlekettik basqarý júıesin odan ári jetildirý týraly» №936 Jarlyǵyna sáıkes munaı men gaz jáne ındýstrııalyq saıasatty retteý salasyndaǵy ýákiletti organdar quziretiniń arajigin ajyratýdy qarastyratyn ereje de bar bolatyn. Sonymen birge, jer qoınaýyn paıdalanýshyǵa onyń osy quqyǵynan aıyrǵan jaǵdaıda enshiles uıym paıdasyna quziretti organ ruqsatyn alýdyń quqyqtyq tetikteri qarastyrylǵan. Jer qoınaýyn paıdalaný maqsatynda zań tártibimen jerdi rezervteýdi qarastyratyn ereje de engizilgen.
Jalpy kelisim komıssııasynyń otyrysyna 20-ǵa tarta túzetýler shyǵarylǵan edi. Bunyń 1-eýi Májilis redaktsııasynda, 7-eýi Senattyń, qalǵany birlesken redaktsııada qabyldandy.
