Jer qoınaýyn paıdalaný quqyǵy «birinshi kelgen - birinshi alady» qaǵıdaty boıynsha beriledi
ASTANA. QazAqparat - Jer qoınaýyn paıdalaný quqyǵy «birinshi kelgen - birinshi alady» qaǵıdaty boıynsha ońaılatylǵan tártippen beriledi. Bul rette, jer qoınaýyn paıdalanýǵa beriletin aýmaq úshin jyl saıyn stavkany ósirý qarastylyrǵan. Búgin Parlament Májilisinde Indýstrııa jáne jańa tehnologııalar mınıstriniń orynbasary Nurlan Saýranbaev osylaı málim etti.
Eske salaıyq, májiliste «Qazaqstan Respýblıkasynyń keıbir zańnamalyq aktilerine jer qoınaýyn paıdalaný máseleleri boıynsha ózgerister men tolyqtyrýlar engizý týraly» zań jobasynyń tanystyrylymy ótken edi.
Mınıstr orynbasarynyń aıtýynsha, barlaýǵa arnalǵan jer qoınaýyn paıdalaný quqyǵyn alýdyń ońaılatylǵan qaǵıdasy Avstralııa, Kanada, Chılı, Fınlıandııa elderinde júzege asyp keledi.
«Bul sıpaty jaǵynan asa ońaı ári tótesinen aıtqanda jer qoınaýyna kim birinshi ótinish berse sol jer qoınaýyn paıdalanýǵa quqyq alady degendi bildiredi. Al mundaı tájirıbeni Qazaqstan zańnamasyna engizsek, ol geologııalyq barlaý jumysyn tezdetip qana qoımaı, tıimdiligin de arttyra túser edi», - dedi N. Saýranbaev. Onyń sózine qaraǵanda, osy baǵyttaǵy túzetýlerdi qabyldaý jer qoınaýyn paıdalaný quqyǵyn berýge jańa kózqarastardy úılesimdi ete túsedi.
«Bul shetel ınvestorlary tarapynan senimniń negizgi sharty bolyp tabylatyn jer qoınaýy jáne jer qoınaýyn paıdalaný týraly zańnamanyń turaqtylyǵyn qoldaý maqsatynda jasalyp otyr. Sonymen qatar, Qazaqstan TMD-ǵa múshe elder arasynda mundaı qaǵıdatty engizetin alǵashqy el bolmaqshy», - deıdi N. Saýranbaev.
