Jer qoınaýyn ıgerýshilermen jergilikti kásiporyndardy qoldaý boıynsha erikti kelisimder jasalady

NUR-SULTAN. QazAqparat –QR Energetıka mınıstrligi jer qoınaýyn ıgerýshilermen jergilikti kásiporyndardy qoldaý boıynsha erikti kelisimder jasaýdy qolǵa aldy. Bul týraly Maǵzum Myrzaǵalıev Úkimet otyrysynda aıtty, dep habarlaıdy QazAqparat tilshisi.

«Mınıstrlik óz tarapynan jergilikti qamtýdy damytý boıynsha birqatar sharalar men bastamalardy júrgizýde. Olardyń negizgileriniń biri elimizde kásipkerlikti yntalandyrý týraly kelisimder jasasý bolyp tabylady. «Atameken» ulttyq kásipkerler palatasymen birlesip, jer qoınaýyn paıdalanýshylarmen «Kásipkerlikti yntalandyrý týraly» kelisim jasasýǵa bastamashylyq jasadyq. Bul kelisimder erikti túrde jasalady», - dedi Energetıka mınıstri.

Onyń aıtýyna qaraǵanda, búgingi tańda kómirsýtekter men ýran boıynsha jasalǵan 282 kelisimsharttyń 164-i boıynsha osyndaı erikti kelisim bekitilgen.

«Olardyń ishinde kómirsýtekter salasyndaǵy 84 jer qoınaýyn paıdalanýshymen 147 kelisim jasalyp, ýran óndirý salasynda 13 jer qoınaýyn paıdalanýshymen 17 kelisimge qol qoıyldy.

Atalǵan kelisimder taýarlardaǵy jergilikti qamtý úlesin 19,5%-dan 31%-ǵy deıin, jumystarda 66,8%-dan 78,6%-ǵa deıin ulǵaıtýǵa múmkindik beredi. Kórsetiletin qyzmetterdegi jergilikti qamtý deńgeıi de 69,4%-dan 88,8%-ǵa deıin artady», - dedi Maǵzum Myrzaǵalıev.