Jer qoınaýyn ıgerip jatqan ınvestorlarǵa salyq jaǵynan jeńildikter berý kózdelgen

ASTANA. QazAqparat - Búgin Ortalyq kommýnıkatsııalar qyzmetinde ótken baspasóz máslıxatynda QR Ulttyq ekonomıka mınıstri Tımýr Súleımenov jańartylǵan Salyq kodeksiniń keıbir tustary jaıynda aıtyp berdi, dep xabarlaıdy QazAqparat tilshisi.

Mınıstrdiń aıtýynsha, kodekske engizilgen ózgeristerdiń biraz bóligi jer qoınaýyn ıgerý jumystaryna arnalǵan.

«Osynyń arqasynda qosymsha terrıtorııalarǵa geologııalyq barlaý jasaýǵa múmkindik týady. Biz kommertsııalyq bonýsty alyp tastaýdy josparlap otyrmyz. Investorlar ony «tabys úshin bonýs» dep ataıdy. Sebebi qandaı da bir resýrstar tabylǵanda ol úshin somanyń biraz bóligin tóleýge týra keledi. Budan bólek, «qol qoıý bonýsyn» tómendetýdi kózdeımiz. Atalǵan salyqty kelisimshartqa qol qoıǵanda tóleıdi», - deıdi Súleımenov.

Sondaı-aq otandyq munaı-gaz salasyna ınvestorlardy kóptep tartý maqsatynda  barlaý men óndirý kezindegi salyqtardy alyp tastaý máselesi qaralyp jatyr. Onyń ornyna naqty kommertsııalyq tabys salyǵyn engizý týraly usynys bar. Ondaıda jer qoınaýyn ıgerip jatqan ınvestor naqty tabysqa ıe bolǵanda ǵana salyqtyń tıisti mólsherin tóleıdi.

Aıta keteıik, baspasóz máslıxatynda mınıstr eki kúnnen keıin kásipkerlikti jappaı damytý baǵdarlamasy aıasynda nesıe berý sharalarynyń bastalatynyn málimdedi . Sondaı-aq qazirgi ekonomıkalyq ósimmen damyǵan 30 memlekettiń qataryna kirý qıyn bolatynyn jetkizdi.