Jer qoınaýyn zertteý sapasy endi jańa tártippen baqylanady
ASTANA. KAZINFORM – Ónerkásip jáne qurylys mınıstriniń 2026 jylǵy 6 sáýirdegi buıryǵymen memlekettik jer qoınaýy qorynyń jaı-kúıin zerdeleýdi baqylaý qaǵıdalary bekitildi.
Atap aıtqanda, qujat geologııalyq aqparattyń tolyqtyǵy men sapasyn, sondaı-aq júrgizilip jatqan jumystardyń bekitilgen baǵdarlamalarǵa, tehnıkalyq tapsyrmalar men jobalyq qujattamaǵa sáıkestigin baqylaý tártibin aıqyndaıdy.
Qaǵıdalarǵa sáıkes, baqylaýdy ýákiletti organ usynylǵan materıaldardy taldaý negizinde júzege asyrady. Bul rette jumystar nátıjeleri jarty jylda bir ret jáne qorytyndy qabyldaý arqyly baǵalanady.
Taldaý barysynda naqty oryndalǵan jumystardyń bekitilgen baǵdarlamalarǵa sáıkestigi, kezeńdiliktiń saqtalýy, usynylǵan qujattamanyń tolyqtyǵy men sapasy, sondaı-aq qoldanylatyn ádistemeler men kútiletin nátıjelerdiń negizdiligi qaralady.
Sonymen qatar bıýdjet qarajatyn paıdalaný tıimdiligine erekshe nazar aýdarylady. Baǵalaý oryndalǵan jumystar kólemi men jumsalǵan qarajatty salystyrý, sondaı-aq josparlanǵan kórsetkishterdiń oryndalýyn eskerý arqyly júrgiziledi.
Qabyldaý qorytyndysy boıynsha ýákiletti organ jumys nátıjelerin qabyldaý, eskertýlermen qabyldaý nemese materıaldardy pysyqtaýǵa jiberý týraly sheshim qabyldaıdy.
Qajet bolǵan jaǵdaıda materıaldar ýákiletti ǵylymı uıym júrgizetin ǵylymı saraptamaǵa joldanýy múmkin. Bul rette saraptama qorytyndylary keńes berý jáne usynymdyq sıpatta bolady.
Qujatta baǵdarlamalardy taldaý baǵalaý sıpatyna ıe ekeni jáne memlekettik baqylaýdyń derbes nysany bolyp tabylmaıtyny atap ótilgen.
Buıryq 2026 jylǵy 26 sáýirden bastap qoldanysqa engiziledi.
Aıta keteıik, jer qoınaýyn paıdalanýshylar byltyr ǵylymı zertteýge 8,9 mlrd teńge baǵyttaǵan edi.
