Jer qoınaýyn zańsyz paıdalaný: Túrkistanda 115 aýyr júk kóligi aıypturaqqa qoıyldy
TÚRKІSTAN. KAZINFORM — Túrkistan oblysynda keń taralǵan paıdaly qazbalardy óndiretin 234 jer qoınaýyn paıdalanýshy tirkelgen. Onyń 75-i kelisimshart, 159-y lıtsenzııa negizinde jumys isteıdi.
Bul týraly oblystyq ónerkásip jáne ındýstrıaldy-ınnovatsııalyq damý basqarmasy basshysynyń orynbasary Qanat Shonbasov málim etti.
Onyń aıtýynsha, ótken jylǵy esepterin tapsyrmaǵan 49 jer qoınaýyn paıdalanýshyǵa qatysty materıaldar zań aıasynda shara qoldaný úshin «Ońtústik Qazjerqoınaýy» óńiraralyq departamentine joldanǵan.
— Al esepterin tolyq tapsyrmaǵan 125 kásipkerge anyqtalǵan kemshilikterdi joıýǵa úsh aı merzim berildi. Talap oryndalmaǵan jaǵdaıda olardyń lıtsenzııalarynyń kúshi toqtatylady. Sonymen qatar oblys aýmaǵynda anyqtalǵan 22 zańsyz qazba orny boıynsha aýdan jáne qala ákimdikteri janynan qurylǵan mobıldi toptar kún saıyn monıtorıng júrgizip jatyr, — dedi Qanat Shonbasov.
Sondaı-aq ken oryndary men zańsyz qazba júrgiziletin aýmaqtardan shyǵatyn aýyr júk kólikteriniń qozǵalysyn baqylaý maqsatynda beınebaqylaý kameralaryn ornatý jumystary bastalǵan.
Oblystyq polıtsııa departamenti bastyǵynyń orynbasary Baýyrjan Janaevtyń málimetinshe, bıylǵy bes aı 20 kúnniń qorytyndysy boıynsha óńirde jer qoınaýyn zańsyz paıdalaný boıynsha 125 quqyqbuzýshylyq anyqtalǵan.
— Nátıjesinde 115 aýyr júk kóligi men 10 arnaıy tehnıka aıypturaqqa qoıyldy. Ekonomıkalyq zalal kólemi eseptelgen 100 materıal boıynsha 10 mln teńgeden astam shyǵyn anyqtalyp, olar ekologııa departamentine joldandy, — dedi spıker.
Ekologııa departamenti 73 derek boıynsha ákimshilik hattama toltyryp, jalpy somasy 5,6 mln teńgege jýyq aıyppul salǵan. Onyń 2,2 mln teńgeden astamy óndirildi. Qalǵan materıaldar zańnamaǵa sáıkes qaralyp jatyr.
Sonymen qatar tekserý barysynda salmaqtyq talaptardy buzǵan jeti aýyr júk kóligine qatysty 19 ákimshilik hattama rásimdelip, jalpy somasy 3,287 mln teńge kóleminde aıyppul óndirilgen.
Aıta keteıik, ótken jyldyń qorytyndysynda jer qoınaýyn paıdalanýshylardan oblystyq bıýdjetke 9,1 mlrd teńge túsken. Onyń 4,8 mlrd teńgesi — jer qoınaýyn paıdalanǵany úshin tólemder, al 4,3 mlrd teńgesi — jasyl beldeýdi damytýǵa baǵyttalǵan tólemder.
Budan bólek lıtsenzııalary toqtatylǵan nemese ıgerilmegen ýchaskelerge júrgizilgen túgendeý nátıjesinde jalpy kólemi 504 myń 750 gektar jer memleket menshigine qaıtaryldy.
Buǵan deıin Kentaý qalasy mańynda «barıt» kenin zańsyz óndirgen eki jergilikti turǵyn men bir shetel azamaty jaýapkershilikke tartylǵany týraly habarlaǵan edik.
